Չավուշօղլուն և Աքարը հեռացան․ Էրդողանը ձևավորել է Թուրքիայի նոր կառավարությունը

Թուրքիայի նախագահ Ռեջեփ Թայիփ Էրդողանը հունիսի 3-ին երդմնակալության արարողությունից հետո պաշտոնապես ներկայացրեց նոր կառավարության կազմը։ Կառավարությունում իրենց պաշտոնները պահպանել են միայն առողջապահության նախարար Ֆահրեթթին Քոջան ու մշակույթի և զբոսաշրջության նախարար Մեհմեդ Նուրի Էրսոյը։

Բազմաթիվ փորձագետներ նշում էին, որ ֆինանսների նախկին նախարար Մեհմեդ Շիմշեքը կվերանշանակվի նախարարների կաբինետում՝ ընդգծելով, որ նրա նշանակումը դրական ազդեցություն կունենա տնտեսական խնդիրների լուծման հարցում։ Էրդողանը երկար ժամանակ նրա հետ բանակցություններ են վարում այդ հարցով, որոնք, փաստորեն, արդյունք են տվել․ Շիմշեքը գանձապետարանի և ֆինանսների նախարարության ղեկավարի պաշտոնում փոխարինել է Նուրեդին Նեբաթիին։

Փոխնախագահի պաշտոնում Ֆուադ Օքթային փոխարինել է Ջևդեթ Յըլմազը, որն իր քաղաքական կարիերայի ընթացքում մշտապես Էրդողանի կողքին է եղել։

Իր հակարևմտյան հայտարարություններով աչքի ընկող ներքին գործերի նախարար Սուլեյման Սոյլուին էլ փոխարինել է Ստամբուլի նահանգապետ Ալի Յերլիքայան։

Էրդողանը նոր կառավարության կազմում չի ներառել նաև նախկին ԱԳ նախարար Մևլութ Չավուշօղլուին․ նրան այդ պաշտոնում փոխարինել է Ազգային հետախուզական կազմակերպության (MİT) ղեկավար Հաքան Ֆիդանը։

ՊՆ ղեկավարի պաշտոնից էլ հեռացել է Հուլուսի Աքարը։ Էրդողանն ազգային պաշտպանության նախարար է նշանակել Գլխավոր շտաբի պետ Յաշար Գյուլերին, որը ԳՇ պետի պաշտոնը զբաղեցնում էր 2018 թվականից։

Ինչ վերաբերում է կառավարության մյուս անդամներին․ շրջակա միջավայրի, քաղաքաշինության և կլիմայի փոփոխության նախարար է նշանակվել Մեհմեթ Օզաշեքին, կրթության նախարար՝ Հաջը Բայրամ Վելի համալսարանի ռեկտոր Յուսուֆ Թեքինը, երիտասարդության և սպորտի նախարար՝ Օսման Աշքըն Բաքը, որն այս պաշտոնը զբաղեցրել է նաև 2017-2018 թվականներին։

Էներգետիկայի և բնական պաշարների նախարարի պաշտոնում նշանակվել է Ալփարսլան Բայրաքթարը, արդյունաբերության և տեխնոլոգիաների նախարարի պաշտոնում՝ Մեհմեթ Ֆաթիհ Քաջըրը, գյուղատնտեսության և անտառային տնտեսության նախարարի պաշտոնում էլ նշանակվել է Իբրահիմ Յումաքլը։ Վերջիններն այս գերատեսչությունների ղեկավարների տեղակալներն են եղել։

Տրանսպորտի և ենթակառուցվածքների նախարար է նշանակել ավտոճանապարհների գլխավոր տնօրեն Աբդուլքադիր Ուրալօղլուն, աշխատանքի և սոցիալական ապահովության նորանշանակ նախարար՝ Վեդաթ Իշըխանը։

Թուրքիայի կառավարության կաբինետում միակ կին նախարարը Մահինուր Օզդեմիր Գյոքթաշն է, որը նշանակվել է ընտանիքի և սոցիալական ծառայությունների նախարար։

Հավելենք, որ Մևլութ Չավուշօղլուն, Հուլուսի Աքարն ու Սուլեյման Սոյլուն իշխող կուսակցության ցուցակով ընտրվել են պատգամավորներ և, ամենայն հավանականությամբ, կվերցնեն մանդատները, քանի որ այլ պաշտոններում չեն նշանակվել։

Էմմա Չոբանյան