06.06.2026 | 18:07
19-ամյա Միրա Անդրեևան` «Ռոլան Գարոսի» հաղթող
Բայրամովը խոսել է ՀՀ-ի հետ բանակցային գործընթացից՝ նշելով, թե «Հայաստանն ու նրա հովանավորները չեն ընդունում նոր իրողությունները և սադրանքներ են անում»
Քաղաքականություն
05.06.2023 | 14:41
Ադրբեջանի ԱԳ նախարար Ջեյհուն Բայրամովը ADA համալսարանում դիվանագետների համար «Արտաքին քաղաքականության ծրագրի» փակման արարողությանը խոսել է Հայաստանի հետ բանակցային գործընթացից։ Նա նշել է, որ Արցախյան 44-օրյա պատերազմը տարածաշրջանում նոր իրողություններ է ստեղծել։
«Հայաստանն ու նրա հովանավորները չեն ցանկանում ընդունել այս իրողությունները և շարունակում են սադրանքները»,- ասել է նա։
Ադրբեջանցի պաշտոնյան, սակայն, չի նշել, թե ո՞ւմ նկատի ունի՝ Հայաստանի հովանավորներ ասելով կամ ինչ սադրանքների մասին է խոսքը։
«Մայիսին ինտենսիվ բանակցություններ են տեղի ունեցել։ Սկզբում Վաշինգտոնում, ապա՝ Մոսկվայում։ Բացի այդ, երկու երկրների ղեկավարները մի քանի անգամ հանդիպել են։ Մոտ ժամանակներս Վաշինգտոնում կանցկացվի բանակցությունների հերթական փուլը»,- տեղեկացրել է Բայրամովը։
Նա ընդգծել է, որ Վաշինգտոնում բանակցությունները որոշակի գործնական դրական արդյունք են տվել, ավելացել է համաձայնեցված կետերի թիվը։
«Սակայն նախկինի պես կան բաց հարցեր, կան կետեր, որոնց շուրջ կողմերի միջև չկա լիակատար համաձայնություն։ Դրա համար էլ գործընթացը շարունակվելու է»,- ասել է Ադրբեջանի ԱԳ նախարարը։
Ըստ նրա՝ «խաղաղությունն անխուսափելի է, և հարաբերությունների կարգավորման համաձայնագիրը պետք է ստորագրվի»։
Էմմա Չոբանյան
