Ադրբեջանի ԱԳՆ-ն դժգոհել է Արմեն Գրիգորյանի հայտարարություններից

Ադրբեջանի ԱԳՆ-ն արձագանքել է ՀՀ Անվտանգության խորհրդի քարտուղար Արմեն Գրիգորյանի հայտարարություններին, որոնք նա հնչեցրել է Հանրային հեռուստաընկերությանը տված հարցազրույցում։ Բաքուն ՀՀ ԱԽ քարտուղարի հայտարարություններն «անընդունելի» է որակել՝ հայտարարելով, թե դրանք, իբր, «խեղաթյուրում են մի շարք ուղղություններով հարցերի էությունը»։

Ադրբեջանի ԱԳՆ-ի հաղորդագրությունում ասվում է, որ Պրահայում (2022թ. հոկտեմբերի 6) և Սոչիում (2022թ. հոկտեմբերի 31) հանդիպումներին հաջորդած պայմանավորվածությունների համաձայն՝ նախատեսվում է իրականացնել սահմանի սահմանազատում տարածքային ամբողջականության և ինքնիշխանության փոխադարձ ճանաչման հիման վրա»:

«Հայկական կողմը տեղյակ  է, որ այս և մյուս հանդիպումներում որևէ քարտեզի հիման վրա սահմանազատման շուրջ պայմանավորվածություն ձեռք չի բերվել։ Այս առումով ավելի օգտակար կլիներ, որ հայկական կողմը սկսեր սահմանազատման աշխատանքներ՝ 1975 թվականի քարտեզի վրա պնդելու փոխարեն»,- ասվում է հայտարարության մեջ։

Նշենք, որ Արմեն Գրիգորյանը հայտարարել էր, որ «սահմանազատման հարցում 1975 թվականի քարտեզի մասով որոշակի առաջընթաց կա, բայց չի  կարող ասել, որ վերջնական լուծված է այդ հարցը»։ Ի դեպ, հունիսի 1-ին Մոլդովայում հնգակողմ հանդիպումից հետո ՀՀ վարչապետ Նիկոլ Փաշինյանը ևս նման հայտարարություն էր արել՝ նշելով, որ, կարծես, համաձայնություն կա 1975 թվականի քարտեզի մասով։

Ադրբեջանի ԱԳՆ-ն նաև շարունակում է պնդել, թե Լաչինի միջանցքը, իբր, փակ չէ՝ հայտարարելով, թե «Հայաստանը միջամտում է Արցախի բնակիչների վերինտեգրացիայի գործընթացին»։

Պաշտոնական Բաքվին դուր չեն եկել նաև Արմեն Գրիգորյանի այն հայտարարությունները, որ Հայաստանը տարբեր երկրների հետ բանակցություններ է վարում զենքի գնման մասով, և որոշ դեպքերում արդեն արդյունքներ կան։

Ըստ Բաքվի՝ «տարածաշրջանում խաղաղ գործընթացն առաջ տանելու փոխարեն՝ հայ պաշտոնյայի հայտարարությունը, թե երկիրը թևակոխել է սպառազինության նոր շրջան, ցույց է տալիս, որ Հայաստանը դեռ պատմության դասեր չի քաղել»։

Հիշեցնենք, որ Ադրբեջանի նախագահ Իլհամ Ալիևն էլ շարունակում է ռազմական հռետորաբանությունը՝ նոր ռազմական գործողություններով սպառնալով Հայաստանին և Արցախին։ Բացի այդ, օրերս էլ Ադրբեջանի ՊՆ ղեկավար Զաքիր Հասանովը հայտարարել էր, որ պետական բյուջեից պաշտպանական ոլորտին հատկացվող հավելյալ գումարներով Բաքուն պատրաստվում է ժամանակակից զինատեսակներ ձեռք բերել։

Էմմա Չոբանյան