14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
ՌԴ-ն հաշվի է առնում Հայաստանի դիրքորոշումը Ուկրաինայի հակամարտության մասով․ Պեսկովի արձագանքը Փաշինյանին
Քաղաքականություն
02.06.2023 | 16:47
Մոսկվան հաշվի է առնում Երևանի դիրքորոշումը Ուկրաինայի հակամարտության մասով, սակայն շարունակում է զարգացնել ռազմավարական հարաբերությունները։ Այս մասին լրագրողներին ասել է ՌԴ նախագահի մամուլի խոսնակ Դմիտրի Պեսկովը, փոխանցում է ՏԱՍՍ-ը։
«Մենք դա ի գիտություն ենք ընդունում»,- ասել է Պեսկովը՝ մեկնաբանելով ՀՀ վարչապետ Նիկոլ Փաշինյանի հայտարարությունը Ուկրաինայի պատերազմի մասով։
Պեսկովի խոսքով՝ «դա կարևոր հայտարարություն է»։
«Մենք գիտենք, որ Ուկրաինայի շուրջ հակամարտության վերաբերյալ Հայաստանի մոտեցումներում կան որոշակի նրբերանգներ, մենք դրանք հաշվի ենք առնում։ Իհարկե, մենք շարունակում ենք զարգացնել մեր հայեցակարգային դաշնակցային հարաբերությունները Հայաստանի հետ»,- հայտարարել է ՌԴ նախագահի մամուլի քարտուղարը։
Հիշեցնենք՝ Նիկոլ Փաշինյանը չեխական CNN primanews հեռուստաընկերությանը տված հարցազրույցում հայտարարել էր, որ Հայաստանն Ուկրաինայի պատերազմում Ռուսաստանի դաշնակիցը չէ։
«Դուք ասացիք, որ մենք Ռուսաստանի դաշնակիցն ենք: Իհարկե, սրա մասին երբեք բարձրաձայն չի ասվել, բայց կարծում եմ՝ դա տեսանելի է. Ուկրաինայի հետ պատերազմում մենք Ռուսաստանի դաշնակիցը չենք: Եվ մեր զգացումն այդ պատերազմից, այդ հակամարտությունից անհանգստությունն է, որովհետև դա ուղիղ ազդում է մեր բոլոր հարաբերությունների վրա»,- ասել էր ՀՀ վարչապետը։
Էմմա Չոբանյան
