19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Բայդենը հայտարարել է, որ Շվեդիան շուտով կմիանա ՆԱՏՕ-ին
Քաղաքականություն
02.06.2023 | 11:45
ԱՄՆ նախագահ Ջո Բայդենը կանխատեսել է, որ Շվեդիան շուտով կանդամակցի ՆԱՏՕ-ին, գրում է Reuters-ը։ ԱՄՆ ռազմաօդային ուժերի ակադեմիայում ունեցած ելույթում Բայդենը դիմել է շրջանավարտներին՝ նշելով, որ նրանք ծառայության կանցնեն գնալով ավելի անկայուն աշխարհում՝ մատնանշելով Ռուսաստանի և Չինաստանի հետ կապված մարտահրավերները:
Բայդենը հայտարարել է, որ ՆԱՏՕ-ն ավելի ուժեղ է՝ չնայած Ռուսաստանի նախագահ Վլադիմիր Պուտինի՝ Ուկրաինայի ներխուժմամբ դաշինքը կոտրելու փորձին: Նա նշել է, որ դաշինքն ավելի է ամրապնդվում, քանի որ վերջերս հաստատվեց Ֆինլանդիայի անդամակցությունը, նաև խոսել Շվեդիայի սպասվող անդամակցությունից։ «Դա կլինի, ես խոստանում եմ»,-ասել է Բայդենը՝ մանրամասներ չներկայացնելով։
Հիշեցնենք, որ Շվեդիայի անդամակցությունը դաշինքին ձգձգվում է Թուրքիայի դիրքորոշման պատճառով։ Երկուշաբթի Բայդենը զրուցել էր Թուրքիայի նախագահ Ռեջեփ Թայիփ Էրդողանի հետ՝ շնորհավորելով նրան վերընտրվելու կապակցությամբ։ Բայդենը լրագրողներին ասել էր, որ Էրդողանը դարձյալ խոսել է ԱՄՆ-ից F-16 կործանիչներ գնելու Անկարայի ցանկությունից, մինչդեռ ԱՄՆ նախագահը կոչ է արել Անկարային հրաժարվել Շվեդիայի՝ ՆԱՏՕ-ին անդամակցելուն դեմ արտահայտվելուց։ ԱՄՆ պետքարտուղար Էնթոնի Բլինքենը ևս կոչ էր արել Թուրքիային անհապաղ ավարտին հասցնել Շվեդիայի՝ ՆԱՏՕ-ի անդամության գործընթացը, քանի որ Ստոկհոլմը նշանակալի քայլեր է արել Անկարայի առարկություններին առնչվող խնդիրները վերացնելու համար։
Էմմա Չոբանյան
