Երիտասարդին ծեծի ենթարկած Դիլիջանի Ոստիկանության քրեականի պետը զղջացել է արարքի համար․ նրա նկատմամբ հանրային քրեական հետապնդում չի հարուցվել

Armlur․am-ն այսօր տեսանյութ էր տարածել, որում երևում է, թե ինչպես է մի տղամարդ ծեծում երիտասարդ տղայի։ Ըստ լրատվամիջոցի տեղեկությունների՝ տղամարդը Դիլիջան քաղաքի քրեական վարչության պետ Արսեն Ղայթմազյանն է։

«Դիլիջան քաղաքի քրեականի պետ Արսեն Ղայթմազյանը մտնում է Հաղարծին հյուրանոցային համալիր և համար պատվիրում, մատուցողն ասում է, որ պատվիրված համարի դիմաց պետք է գումար վճարել, որից հետո սկսվում է քրեականի պետի ու աշխատակցի հետ գումարի շուրջ խոսակցություն, ինչից հետո քրեականի պետը սկսում է հարվածներ հասցնել 16-ամյա մատուցողին»,- գրել է լրատվամիջոցը։

Քննչական կոմիտեի մամուլի խոսնակ Գոռ Աբրահամյանը Factor.am-ին հայտնեց, որ դեպքը տեղի է ունեցել այս տարվա ապրիլի 10-ին։ Երիտասարդը ճանաչվել է տուժող։

«Քաղաքացու հաղորդումը Դատախազությունից ՀՀ Քննչական կոմիտե է ստացվել մայիսի 10-ին, նույն օրը ՀՀ քննչական կոմիտեի Տավուշի մարզային քննչական վարչությունում ՀՀ քրեական օրենսգրքի 195-րդ հոդվածի 2-րդ մասի 3-րդ կետով նախաձեռնվել է քրեական վարույթ, կատարվել է նախաքննություն։ 2006թ․ ծնված երիտասարդը, որը ռեստորանահյուրանոցային համալիրում աշխատում է որպես մատուցող, ճանաչվել է տուժող։ Արտաքին զննությամբ վերջինի մոտ մարմնական վնասվածքներ չեն հայտնաբերվել»,- ասաց Գոռ Աբրահամյանը։

Ըստ կոմիտեի մամուլի խոսնակի՝ նախաքննության ընթացքում քրեականի պետը վարույթ իրականացնող մարմնին ներկայացրել է դիմում այն մասին, որ ամբողջությամբ զղջում է կատարածի համար, հանդիպել է տուժողին և ներողություն խնդրել նրանից, պատրաստ է ներողություն խնդրել նաև նրա ծնողներից, հասկացել և գիտակցում է, որ դրսևորել է ոչ պատշաճ վարքագիծ և խնդրել է իր նկատմամբ հանրային քրեական հետապնդում չհարուցել։

«Հաշվի առնելով վերոգրյալը, ինչպես նաև այն հանգամանքը, որ Ա․Ղ․-ն վարույթի շրջանակում համագործակցել է վարույթ իրականացնող մարմնի հետ, որևէ կերպ չի վիճարկում իրեն մեղսագրվող արարքը, որը համարվում է ոչ մեծ ծանրության հանցավոր արարք, 2023թ․ մայիսի 29-ին միջնորդություն է ներկայացվել քրեական վարույթով հսկող դատախազին նրա նկատմամբ ՀՀ քրեական օրենսգրքի 195-րդ հոդվածի 2-րդ մասի 3-րդ կետով, գործուն զղջալու, այսինքն՝ ոչ ռեաբիլիտացնող հիմքով, քրեական հետապնդում չհարուցելու մասին, որը բավարարվել է»,- հայտնեց ՔԿ մամուլի խոսնակը։

Արփի Հակոբյան