14.08.2026 | 23:22
Հուլիսին Ուկրաինայում զոհվել է առնվազն 437 խաղաղ բնակիչ՝ ամենաբարձր ցուցանիշը 2022-ից ի վեր. ՄԱԿ
Թրամփը խոստովանել է, որ Պենտագոնի գաղտնի փաստաթուղթ է պահել իր մոտ․ CNN
Քաղաքականություն
01.06.2023 | 15:21
ԱՄՆ դատախազությունը հայտնաբերել է նախկին նախագահ Դոնալդ Թրամփի կողմից Սպիտակ տնից վերցրած գաղտնի փաստաթղթերից մեկի քննարկման ձայնագրությունը։ Այս մասին հայտնել է CNN-ը՝ հղում անելով սեփական աղբյուրներին։
2021 թվականի ամռանն արված ձայնագրության մեջ Թրամփը խոստովանում է, որ ունի Իրանի հնարավոր հարձակման մասին Պենտագոնի գաղտնի փաստաթուղթը։ Նախկին նախագահը պնդել է, որ փաստաթուղթը ստացել է ԱՄՆ զինված ուժերի շտաբի պետերի միացյալ շտաբի նախագահ, գեներալ Մարկ Միլիից։
Թրամփի նախընտրական շտաբի ներկայացուցիչը, մեկնաբանելով CNN-ի հրապարակումը, հայտարարել է, որ նման «արտահոսքերը» միայն նպատակ ունեն «սրելու լարվածությունը»։
«Արդարադատության նախարարության շարունակական միջամտությունը նախագահական ընտրություններին ամոթալի է, իսկ այս անհիմն հետաքննությունը պետք է դադարեցնի ԱՄՆ հարկատուների գումարները վատնել դեմոկրատների քաղաքական նպատակների վրա»,- նշել է նա:
2022 թվականին ՀԴԲ-ն Ֆլորիդայում Թրամփի Մար-ա-Լագոյի կալվածքից հայտնաբերել էր ավելի քան 300 փաստաթուղթ: Թրամփի նստավայրում ՀԴԲ գործակալների կողմից հայտնաբերված փաստաթղթերի ցանկը, ի թիվս այլ բաների, ներառել է նաև «հույժ գաղտնի» և «գաղտնի» մակագրությամբ փաստաթղթեր:
Տաթև Ֆռանգյան
