06.06.2026 | 14:11
Հայ շախմատիստների վերջնական արդյունքները կանանց ԵԱ-ում
Մոնղոլիայի նորանշանակ դեսպանն իր հավատարմագրերի պատճենն է հանձնել ՀՀ ԱԳ նախարարի տեղակալին
Քաղաքականություն
31.05.2023 | 16:08
Մայիսի 30-ին ՀՀ ԱԳ նախարարի տեղակալ Պարույր Հովհաննիսյանն ընդունել է Մոնղոլիայի նորանշանակ դեսպան Ուլզիիսաիխան Էնխտուվշինին (նստավայրը՝ ք․Մոսկվա) հավատարմագրերի պատճենը հանձնելու կապակցությամբ։
Նախարարի տեղակալ Պարույր Հովհաննիսյանը, շնորհավորելով դեսպան Էնխտուվշինին առաքելությունը ստանձնելու կապակցությամբ, նշել է, որ հայ-մոնղոլական կապերը դարավոր պատմություն ունեն: Այդ համատեքստում նա համոզմունք է հայտնել, որ դեսպանն իր նպաստը կբերի Հայաստանի և Մոնղոլիայի միջև հարաբերությունների առավել ամրապնդմանն ու խորացմանը:
Երկուստեք արձանագրվել է, որ առկա է երկկողմ համագործակցության չիրացված զգալի ներուժ, ինչի կապակցությամբ կողմերը պատրաստակամություն են հայտնել առավելագույն ջանքեր գործադրել, մասնավորապես, առևտրատնտեսական և գործարար կապերի, զբոսաշրջության, կրթության և գիտության, մշակութային փոխանակումների և այլ ոլորտներում առկա փոխգործակցության զարգացման ուղղությամբ։ Կարևորվել է նաև փոխադարձ բարձրաստիճան այցերի կազմակերպումը, ինչպես նաև միջխորհրդարանական կապերի ակտիվացումը։
Հանդիպմանը Պարույր Հովհաննիսյանը զրուցակցին է ներկայացրել նաև հայ-ադրբեջանական հարաբերությունների և Լեռնային Ղարաբաղի շուրջ վերջին զարգացումները։ Այդ համատեքստում նախարարի տեղակալը կարևորել է Հայաստանի ինքնիշխանության և տարածքային ամբողջականության դեմ ադրբեջանական ագրեսիան, ինչպես նաև Լաչինի միջանցքի արգելափակումը դատապարտող միջազգային արձագանքները:
