Թուրքիայում Էրդողանի հաղթանակի տոնակատարության ժամանակ ընդդիմադիր գործիչներ են տուժել

Թուրքիայում նախագահ Ռեջեփ Թայիփ Էրդողանի՝ ընտրությունների երկրորդ փուլում հաղթանակի տոնակատարության ժամանակ ընդդիմադիր կուսակցության անդամ է սպանվել, մի քանիսը վիրավորվել են, գրում է Turkish Minute-ը։

CHP-ի դաշնակից, ազգայնական ընդդիմադիր İYİ (Լավ) կուսակցության գլխավոր քարտուղար Ուղուր Պոյրազը հայտարարել է, որ կուսակցության անդամ Էրհան Քուրթը սպանվել է Օրդուի Գյուլյալի շրջանում կուսակցության գրասենյակի դիմաց Էրդողանի աջակիցների տոնակատարությունների ընթացքում հարձակման հետևանքով։

Հաղորդվում է, որ Քուրթը դանակահարվել է իր ու Էրդողանի «Արդարություն և զարգացում» կուսակցության մի խումբ կողմնակիցների միջև վեճի ժամանակ, և չնայած բժիշների ջանքերին՝ կյանքը փրկել չի հաջողվել։ Հարձակման մեջ կասկածվողները ձերբակալվել են իրավապահների կողմից։

«Որպես ազգ՝ մենք դատապարտում ենք այս դավաճանական հարձակումը, որը մեզ բաժանող լեզվի և ներգրավված մեղավորներին բաժանող լեզվի արդյունքն է: Մենք ուշադիր հետևելու ենք դատական գործընթացին»,- նշել է Պոյրազը։

Տեղական լրատվամիջոցները հայտնում են, որ Մարդին նահանգում էլ տոնակատարության ժամանակ օդ կրակող Ահմեդ Գ.-ն քննադատության է ենթարկվել հարևան Ահմեդ Աքբուլութի կողմից։ Ի պատասխան՝ Աքբուլութի վրա հարձակվել են Ահմեդ Գ.-ն և նրա հարազատներից մեկը։ Աքբուլութը ծանր վիրավորում է ստացել, տեղափոխվել է հիվանդանոց, որտեղ բժիշկները հայտնել են, որ նա աչքը կորցնելու վտանգի տակ է: Տղամարը տեղափոխվել է Դիարբեքիր՝ հետագա բուժման համար։

Աբդուլազիզ Չաքմաք անունով մի տղամարդ էլ, որը մասնակցել է Միդյաթում երկրորդ փուլին հաջորդած տոնակատարություններին, վիրավորվել է օդ արձակված գնդակից։ Նա վզի շրջանում վիրավորումով տեղափոխվել է հիվանդանոց, վիճակը ծանր է։

Իսկ Չորում նահանգում CHP-ի շենքի դիմաց սկսված նախընտրական տոնակատարությունները ծեծկռտուքի վերածվելուց հետո վիրավորվել են ընդդիմադիր կուսակցության երկու անդամներ։ Էրդողանի մի խումբ կողմնակիցներ էլ քարեր են հետել ընդդիմադիր կուսակցության շենքի ուղղությամբ։

Էմմա Չոբանյան