06.06.2026 | 17:50
Ընտրական հանցագործությունների գործերով ձերբակալվել է 194, քրեական հետապնդման ենթարկվել՝ 209 անձ. ՀԿԿ
Նախորդ տարվա փառատոնին 10․000 գիրք էր վաճառվել․ ԿԳՄՍ նախարար․ ՏԵՍԱՆՅՈՒԹ
Հասարակություն
24.05.2023 | 15:00
Գրքի երևանյան միջազգային վեցերորդ փառատոնին նվիրված ասուլիսում ՀՀ կրթության, գիտության, մշակույթի և սպորտի նախարար Ժաննա Անդրեասյանը հիշեցրեց, որ փառատոնն անցկացվում է 2017 թվականից և նախորդ տարվանից միջազգային բնույթ է ստացել՝ ընդլայնելով համագործակցությունը տարբեր կազմակերպությունների, հրատարակչությունների, հեղինակների, գրաքննադատների, ոլորտի այլ մասնագիտական խմբերի հետ:
«Փառատոնը դառնում է միջազգային հարթակ, ինչը կարող է էլ ավելի կշիռ հաղորդել այստեղ իրականացվող ցանկացած միջոցառման ու բարձրացնել գրավչությունը: Կարևորում եմ այն, որ փառատոնին մասնակցում են շուրջ 40 հրատարակիչներ, ինչպես կայացած, այնպես էլ սկսնակ: Զարմանալի չէ, որ նախորդ տարվա փառատոնին շուրջ տասը հազար գիրք է վաճառվել: Կան հրատարակիչներ, որ նշում են՝ միայն փառատոնի օրերին նույնքան գիրք են վաճառում, որքան ամբողջ տարվա ընթացքում»,-նշեց նախարարն ու հավելեց՝ փառատոնը դառնում է գրականության մասին խոսելու, նոր գրքեր ներկայացնելու և այդ գրքերի միջոցով մեր հեղինակներին ճանաչելի դարձնելու հարթակ:
Անդրեասյանի կարծիքով՝ փառատոնը կարող է համագործակցել նաև կրթական հաստատությունների հետ և դպրոցականների, ուսանողների ամենահաճախելի միջոցառումներից մեկը դառնալ:
Նշենք, որ գրքի երևանյան միջազգային փառատոնը 2023-ին գրողներին, հրատարակիչներին ու ընթերցողներին կհամախմբի Գաբրիել Սունդուկյանի անվան ազգային ակադեմիական թատրոնում: Մայիսի 25-27-ին փառատոնի շրջանակում Մայր թատրոնի տարբեր հարթակներում կանցկացվեն գրքերի շնորհանդեսներ, կլինեն հանդիպումներ տեղի և աշխարհի տարբեր երկրներից Հայաստան ժամանած անվանի հեղինակների, ոլորտի այլ ներկայացուցիչների հետ, իսկ փառատոնի շրջանակում գործող գրքի տոնավաճառից հնարավոր կլինի նախընտրելի գրքերը ձեռք բերել 20-ից 50 տոկոս զեղչով:
Մանրամասները՝ տեսանյութում։
