«Արարատ» կոնյակը շարունակվում է մատակարարվել Ռուսաստան․ Luding Group

Luding Group ալկոհոլային ընկերությունը սովորական ռեժիմով շարունակում է Երևանի կոնյակի գործարանի «Արարատ» կոնյակի մատակարարումը Ռուսաստան։ Այս մասին «Կոմերսանտ»-ին հայտնել են Luding Group-ից։

Ընկերությունից հավելել են, որ ապրանքանիշի և գործարանի սեփականատեր Pernod Ricard-ի հետ առաքման պայմանագիրն ուժի մեջ է, և Luding-ն «Արարատ» ապրանքանիշի վերաբերյալ համագործակցության դադարեցման մասին որևէ ծանուցում չի ստացել։

Ըստ Luding-ի՝ «Արարատ»-ի բաշխման աշխարհագրությունն ընդգրկում է ամբողջ Ռուսաստանը՝ բացառությամբ դաշնային ցանցերի։ Պայմանագրի մեկնարկից ի վեր՝ 2021 թվականի հոկտեմբերից, իրացվել է ավելի քան 1,3 միլիոն լիտր կոնյակ՝ չհաշված այն ծավալը, որն ուղղակիորեն Pernod Ricard-ի կողմից մատակարարվել է հիմնական ցանցերին։ Շուկայում «Կոմերսանտ»-ի աղբյուրների համաձայն՝ տարեկան մոտ 4 մլն լիտր «Արարատ» է մատակարարվում Ռուսաստանի Դաշնություն։

Նշենք, որ ՀՀ էկոնոմիկայի նախարար Վահան Քերոբյանն անցած շաբաթ ասել էր, որ Երևանի կոնյակի գործարանը կարող է դադարեցնել «Արարատ» կոնյակի արտահանումը Ռուսաստան։ Դրան նախորդել էր Pernod Ricard-ի հայտարարությունը միջազգային ապրանքանիշերի արտահանումը Ռուսաստանի Դաշնություն դադարեցնելու և ռուսական շուկայում բաշխումը կասեցնելու մասին։ «Ինտերֆաքս»-ը, վկայակոչելով Երևանի կոնյակի գործարանի իր աղբյուրին, ավելի ուշ հայտնել էր, որ ընկերությունը շարունակում է կատարել իր պարտավորությունները բոլոր երկրների բոլոր գործընկերների նկատմամբ։