Հայերի ճնշման տակ Նիկոլ Փաշինյանը հրաժարական տալու է. Հայկ Մամիջանյան․ ՏԵՍԱՆՅՈՒԹ

Նիկոլ Փաշինյանի երեկվա ասուլիսում հնչեցրած մտքերը նորություն չէին։ Այս մասին այսօր ԱԺ-ում լրագրողների հետ զրույցում նշեց ԱԺ «Պատիվ Ունեմ» խմբակցության ղեկավար Հայկ Մամիջանյանը։

«Հարց եք տալիս՝ երեկվա հետ կապված, բայց երեկ ինձ համար ոչինչ տեղի չի ունեցել։ Ինձ համար երեկ ոչ մի նոր բան տեղի չի ունեցել, այն, որ Փաշինյանը բանակցում է Արցախն Ադրբեջանի կազմ թողնելու համար, ասել ենք մեկ տարի առաջ, կես տարի առաջ ապացուցել ենք հրապարակված փաստաթղթերով, ապացուցել ենք եվրոպացիների հետ մեր աշխատանքային շփումների հանրայնացմամբ։
Ինչ վերաբերում է ծավալվող գործընթացներին, ես կարող եմ խոսել Հանրապետական կուսակցության և «Պատիվ ունեմ» խմբակցության անունից։ Մենք պայքարը չենք դադարեցրել, օրեր շարունակ եղել ենք զոհված զինծառայողների հարազատների կողքին։ Այսինքն՝ մեզ համար ինչ-որ բան տեղի չի ունեցել, որից հետո պետք է անցնենք պայքարի ակտիվ փուլի, մեզ համար պայքարի ակտիվ փուլը չի էլ դադարել։
Սա քաղաքական ուժի, քաղաքական գործչի պայքար չէ, սա համազգային պայքար է։

Հույս ունեմ, որ գոնե երեկվա ամբողջությամբ բաց ասված տեքստից հետո չենք լսի կասկածով լի հայտարարություններ։ Յուրաքանչյուրն իր տեղում անելիք ունի՝ քննիչից մինչև դատավոր, քաղաքացի, մինչև ԱԺ պատգամավոր»,- նշեց Հայկ Մամիջանյանը։

Հայկ Մամիջանյանն ընդգծեց, որ միևնույն է, թե Նիկոլ Փաշինյանն ինչ կասի, դա հետաքրքիր չէ, նրանից միայն մեկ բան է ակնկալում լսել՝ հրաժարականի մասին։

«Ես հույս չունեմ, ես գիտեմ, որ հայերի ճնշման տակ Փաշինյանն այդ հրաժարականը տալու է։ Ուղղակի աշխարհի տարբեր բռնապետներ, պատմության ընթացքում, տարբեր ձևով են գնացել։ Ես Փաշինյանին խորհուրդ կտամ՝ թող բացի նայի, թե որ բռնապետն ինչ ճանապարհով է գնացել, ու ընտրի իր ճակատագիրը»,- նշեց Հայկ Մամիջանյանը։

Մանրամասները՝ տեսանյութում։