Սպիտակ համայնքի ղեկավարի որդու կողմից ծեծի ենթարկվելու փաստով Սարամեջի ղեկավարի ամուսինը տուժող է ճանաչվել

Սարամեջ վարչական ղեկավարի ամուսինը՝ Էդգար Հովհաննիսյանը տուժող է ճանաչվել Սպիտակ համայնքի ղեկավարի որդու՝ Գոռ Նիկողոսյանի կողմից ծեծի ենթարկվելու գործով։ Այս մասին Factor.am-ին տեղեկացրեց Քննչական կոմիտեի մամուլի քարտուղար Գոռ Աբրահամյանը։

«Դեպքի առթիվ քրեական վարույթ է նախաձեռնվել Քրեական օրենսգրքի 171-րդ հոդվածի 1-ին մասով (Առողջությանը թեթև վնաս պատճառել)։ Տուժողի նկատմամբ նշանակվել է դատաբժշկական փորձաքննություն, այս պահին գործով անցնող մեղադրյալ չկա, քննչական աշխատանքները շարունակվում են»,- նշեց Աբրահամյանը։

Թեև մեղադրյալ չկա, սակայն Սպիտակ համայնքի ղեկավարի որդին խոստովանել է, որ մայիսի 18-ի երեկոյան ինքն է ծեծել Հովհաննիսյանին, ինչի հետևանքով վերջինս վնասվածքներով Սպիտակի հիվանդանոց է տեղափոխվել։ Գոռ Նիկողոսյանը ձերբակալվել, սակայն ժամեր անց ազատ է արձակվել։ Քննչական մարմինների կողմից այս պահին որևէ անձի մասով ձերբակալման կամ կալանքի միջնորդությամբ դատարան դիմելու հարց չկա։

Մայիսի 18-ին ՀՀ Ներքին գործերի նախարարության ոստիկանության Սպիտակի բաժին էր դիմել Լոռու մարզի Սարամեջ բնակավայրի բնակիչ, 37-ամյա Թամարա Մինասյանը և հայտնել, որ Սպիտակ համայնքում անհայտ անձը ծեծի է ենթարկել իր ամուսնուն՝ Սարամեջ բնակավայրի բնակիչ, 42-ամյա Էդգար Հովհաննիսյանին, և վերջինս մարմնական վնասվածքներով բուժօգնության է դիմել Սպիտակ բժշկական կենտրոն։

Մայիսի 18-ին՝ ժամը 21․30-ի սահմաններում, Սպիտակ քաղաքի իտալական թաղամասում գտնվող «Հայփոստ»-ի բաժանմունքի դիմաց վիճաբանություն է տեղի ունեցել Հովհաննիսյանի և Սպիտակ քաղաքի բնակիչ, 26-ամյա Գոռ Նիկողոսյանի միջև, որի ժամանակ վերջինս ձեռքերով հարվածներ է հասցրել Հովհաննիսյանի մարմնի տարբեր մասերին՝ պատճառելով մարմնական վնասվածքներ։

Ռոզա Վարդանյան