24.11.2024 | 11:12
Ռուբլու փոխարժեքը շարունակում է իջնել
Միրզոյանն ու Բայրամովը խոսում են առաջընթացից․ մոսկովյան բանակցությունների մանրամասները․ ՏԵՍԱՆՅՈՒԹ
Քաղաքականություն
19.05.2023 | 19:11
Մոտ կես տարվա դադարից հետո Մոսկվայում այսօր տեղի ունեցավ Միրզոյան-Լավրով-Բայրամով հերթական հանդիպումը։ Երեք երկրների արտաքին գործերի նախարարները Լաչինի միջանցքի փակումից հետո առաջին անգամ նստեցին նույն սեղանի շուրջ։
Մինչ այդ, Սերգեյ Լավրովը նախ առանձնազրույցներ ունեցավ Միրզոյանի և Բայրամովի հետ, ապա երկու երկրների պատվիրակությունների մասնակցությամբ բանակցությունների բաց հատվածն էր, որին արդեն հաջորդեց փակ մասը։
Գլխավոր թեման, ըստ Ռուսաստանի արտաքին գործերի նախարարի, Հայաստանի և Ադրբեջանի մինջև հարաբերություների կարգավորումն է, ինչպես նաև այն քայլերը, որոնք Ռուսաստանը պետք է ձեռնարկի՝ վերջին երեք տարում կողմերի ստորագրած եռակողմ հայտարարությունների լիարժեք կատարմանը նպաստելու համար։ Ըստ Լավրովի՝ երկրների ղեկավարների կողմից ստորագրված եռակողմ հայտարարությունները կայուն լուծումների հասնելու ճանապարհային քարտեզներ են:
Հայաստանի ԱԳ նախարար Արարատ Միրզոյանը մինչ այս Լավրովի հետ երկկողմ հանդիպմանն ընդգծել էր՝ հայկական կողմը հավատարիմ է նոյեմբերի 9-ի եռակողմ հայտարարությանը, նաև դրանից հետո Մոսկվայում ձեռք բերված պայմանավորվածություններին, սակայն դրանք խախտված են, և ո՛չ Հայաստանի մեղքով։ Նախարար Միրզոյանը վստահեցրեց՝ հայկական կողմը կառուցողական է և նպատակադրված՝ հասնելու տևական խաղաղության։
Արդեն եռակողմ հանդիպման բաց հատվածում Արարատ Միրզոյանը խոսեց խաղաղության հնարավոր պայմանագրի որոշ դրույթների շուրջ արձանագրված առաջընթացի մասին։
Այն, որ խաղաղության պայմանագրի շուրջ բանակցություններում կա դրական դինամիկա, ընդգծել է նաև Ադրբեջանի արտաքին գործերի նախարար Ջեյհուն Բայրամովը։
Ավելի քան երկու ժամ տևած եռակողմ բանակցություններից հետո Ռուսաստանի արտաքին գործերի նախարար Սերգեյ Լավրովը որոշ մանրամասներ ներկայացրեց բանակցություններից՝ հայտարարելով, թե խաղաղության պայմանագրով և մի շարք դրույթներով, որոնք այսօր քննարկվել են, հնարավոր է եղել երկու կողմերի փոխըմբռնումը մոտեցնել ընդհանուր տեսլականին։
Հայաստանի և Ադրբեջանի պատվիրակությունները նախարարների գլխավորությամբ այսօր ունեցան նաև երկկողմ բանակցություններ։ Իսկ արդեն մայիսի 25-ին Մոսկվայում կհանդիպեն Փաշինյանն ու Ալիևը։
Մանրամասները՝ տեսանյութում։
Շողիկ Գալստյան
