16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Միջազգային թատերական 10-րդ օլիմպիադայում հայկական թատերախումբը ներկայացել է բեմադրությամբ
Մշակույթ
19.05.2023 | 15:23
Հակոբ Պարոնյանի անվան երաժշտական կոմեդիայի պետական թատրոնը մայիսի 10-15-ը մասնակցել է Հունգարիայում կայացած միջազգային թատերական 10-րդ օլիմպիադային։ Սեգեդ քաղաքում թատերախումբը ներկայացրել է բրազիլացի գրող Պաուլո Կոելիոյի «Վերոնիկան որոշում է մահանալ» ներկայացումը։ «Արմենպրես» լրատվական գործակալությունում այսօր տեղի ունեցած մամուլի ասուլիսին Հակոբ Պարոնյանի անվան երաժշտական կոմեդիայի պետական թատրոնի տնօրեն Կարո Շահբազյանը նշեց, որ Միջազգային թատերական օլիմպիադայի միջազգային կոմիտեի անդամ են աշխարհի հանրահայտ թատերական գործիչները՝ ռեժիսորներ, բեմադրող նկարիչներ և արտիստներ։
Թատրոնի տնօրեն Կարո Շահբազյանն ասաց, որ նախօրոք ներկայացրել են մի քանի բեմադրություններ և ընտրել են Պաուլո Կոելիոյի ստեղծագործությունը։
«Մենք ավելի հակված էինք հայ հեղինակի աշխատանքով ներկայանալ, բայց, կարծում եմ, Կոելիոյի հանրահայտ լինելով, ինչու չէ, նաև «Վերոնիկան որոշում է մահանալ» ստեղծագործության բեսթսելլեր լինելով, ընտրվեց այդ գործը»,- նշեց Կարո Շահբազյանը։ Ըստ թատրոնի տնօրենի՝ տարածաշրջանի երկրներից միայն Հայաստանն է մասնակցել օլիմիպիադային։
Պարոնյանի անվան երաժշտական կոմեդիայի պետական թատրոնի բեմադրիչ Արթուր Սարիբեկյանի խոսքով՝ դժվար էր օտար հանդիսատեսին ներկայացնել ստեղծագործության հիմնական գաղափարը, ինչպես ասաց Սարիբեկյանը թատրնն ունի արտահայտչամիջոց՝ գործողություն, որի միջոցով թատերախումբը կարողացել է իր խոսքը փոխանցել հանդիսատեսին։
«Երբ առաջին անգամ կարդացի Կոելիոյի ստեղծագործությունը գիրքը ծալեցի, դրեցի մի անկյունում և հետո հասկացա, որ ենթագիտակցությանս մեջ մնացել է ամենակարևոր գաղափարը ապրել, ինչ էլ որ լինի։ Ենթագիտակցությանս մեջ անընդհատ այն միտքն էր որ պետք է ստեղծագործել, պետք է ապրել, շարունակել հոտոտել կյանքի գունավոր երանգները։ Արդեն երկրորդ անգամ ստեղծագործությունը կարդալուց հետո հասկացա որ դա եմ ուզում ասել և անմիջապես վեպից վերածեցի պիեսի»,- պատմում է Արթուր Սարիբեկյանը։
Դերասաններ Ավո Խալաթյանը և Մարիամ Ղազանչյանը կիսվեցին իրենց տպավորություններով։ Հատկապես դերասաններին տպավորել էր հանդիսատեսի վերաբերմունքը և արձագանքը։ Դերասան Ավո Խալաթյանի խոսքով՝ այն փաստը, որ թատրոնը շրջագայում է, արդեն իսկ մեծ փորձ է։
Միջազգային շրջագայութոյուններից բացի թատրոնը նախատեսում է հունիսի 1-ին՝ Երեխաների պաշտպանության միջազգային օրը, այցելել Սյունքի մարզ մանկական ներկայացումներով։
Սոնա Հովսեփյան
