Հասարակություն
17.05.2023 | 18:31
ՀՀ հակակոռուպցիոն կոմիտեում իրականացված քրեական վարույթով ձեռք բերված ապացույցներով հիմնավորվել է, որ Գ. Ղ.-ն, զբաղեցնելով «Հայանտառ» ՊՈԱԿ-ի «Վանաձորի անտառտնտեսություն» մասնաճյուղի Վահագնիի անտառպետության անտառապահի պաշտոնը, դիտավորությամբ չի կատարել իր պաշտոնից բխող լիազորությունները, որի հետևանքով պետությանը հասցվել է 3.228.000 ՀՀ դրամի գույքային վնաս: Այդ մասին հայտնում են Հակակոռուպցիոն կոմիտեից:
Մասնավորապես՝ նախաքննությամբ պարզվել է, որ Գ. Ղ.-ն, Լոռու մարզի մի խումբ բնակիչների հետ ունեցած բարիդրացիական հարաբերությունները չխզելու անձնական շահագրգռվածությունից ելնելով, վերջիններիս թույլատրել է 2021 թվականի ընթացքում պարբերաբար անարգել մուտք գործել Վահագնիի անտառպետության պահաբաժիններից մեկի տարածք և առանց թույլտվության կատարել ապօրինի ծառահատումներ: Դրանից հետո հիշյալ անձինք փայտանյութը բեռնել են իրենց կողմից շահագործվող ավտոմեքենաներն ու ապօրինի դուրս բերել անտառից՝ օգտագործելով ըստ հայեցողության:
Այնուհետև Գ. Ղ.-ն կազմել է անտառախախտման 2 արձանագրություն, համաձայն որի՝ իբրև անհայտ անձի կողմից Վահագնիի անտառպետության իր կողմից սպասարկվող պահաբաժնում կատարվել է ընդհանուր 16 հատ կաղնու ապօրինի հատում: Անտառախախտման հիշյալ արձանագրությունների հիման վրա ՀՀ բնապահպանության և ընդերքի տեսչական մարմնի աշխատակիցների կողմից կատարվել է վնասի հաշվարկ, որի ընթացքում 16 կաղնիներից բացի հայտնաբերվել է ապօրինի հատված ևս 4 ծառ: Ըստ հաշվարկների՝ ծառերի ապօրինի հատման հետևանքով պատճառված վնասի ընդհանուր չափը կազմել է 3.228.000 ՀՀ դրամ:
Վերը նշված հանցանքի համար Գ. Ղ.-ին մեղադրանք է ներկայացվել ՀՀ քրեական օրենսգրքի 441-րդ հոդվածի 1-ին մասով: Նախաքննության ընթացքում Գ. Ղ.-ն իրեն մեղավոր է ճանաչել, տվել խոստովանական ցուցմունքներ:
Նախաքննությունն ավարտվել է: Վարույթի նյութերը մեղադրական եզրակացությամբ հանձնվել են հսկող դատախազին՝ այն հաստատելու և դատարան ուղարկելու միջնորդությամբ:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
