23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Կանեփը օգտակար բույս է․ այն վարկաբեկվել է տարիներ շարունակ. պատգամավոր. ՏԵՍԱՆՅՈՒԹ
Տնտեսություն
17.05.2023 | 14:16
Կանեփը, որպես բույս, տարիներ շարունակ վարկաբեկվել է։ Մարդկանց մոտ կան տպավորված կարծրատիպեր, սակայն այն նաև օգտակար բույս է։ Այս մասին այսօր ՀՀ ազգային ժողովի տնտեսական հարցերի մշտական հանձնաժողովի նիստում «Թմրամիջոցների և հոգեմետ նյութերի մասին» օրենքում փոփոխություններ և լրացումներ կատարելու մասին» օրենքի նախագծի քննարկման ժամանակ այս մասին հայտարարեց Քաղաքացիական պայմանագիր խմբակցության պատգամավոր Հայկ Ցիրունյանը։
Պատգամավորն ընդգծեց, որ արտադրական կանեփը կարող է լայն կիրառություն ունենալ և շատ օգտակար լինել, և այն չպետք է միայն թմրամիջոցի հետ զուգորդել։
«Կանեփ բույսը մեր երկրում այնքան հնուց է աճում, որ փողոցներում էլ անգամ կա։ Հայաստանի ամբողջ տարածքում կանեփ կա, եթե այդպես պայքարում ենք, եկեք ամբողջ կանեփը հավաքենք վառենք․ այդպես հնարավոր չէ։ Շատ լավ է թմրամիջոցների դեմ պայքարելը, բայց այն ինչ մենք ընդունել ենք այս օրենքով, պետությանն օգուտ բերելու համար ենք արել», – նշեց պատգամավորը։
Ըստ Ցիրունյանի՝ արտադրական կանեփը հատկապես օգտակար է գյուղատնտեսության ոլորտում, քանի որ այն վերականգնում է նաև հողերի վիճակը։
«Արտադրական կանեփն ամբողջ աշխարհում մեկ տարի ցանում են կավացած, աղակալած հողերում, քանի որ այս բույսը ջուր չի պահանջում, ինչից հետո այդ նույն հողում կարելի է երեք տարի լոլիկ ցանել։ Այն այդքան հարստացնում է հողը։ Այն նաև օգտակար բույս է։ Խնդրում եմ վերաբերվել շատ ավելի մտածված», – նշեց Ցիրունյանը՝ հորդորելով նման քննարկումների ժամանակ չօգտագործել թմրամիջոց բառը։
Հիշեցնենք, որ արտադրական կանեփի վերամշակման գործընթացի վերաբերյալ քննարկումները սկսվել են 2021 թվականից, և 2022 թվականի ապրիլին կառավարության նիստում վերանայվել էին արտադրական կանեփի արտադրության քվոտաները` մեծացնելով արտահանման և մեծածախ առևտրի համար նախկինում սահմանված քվոտաները։
Մանրամասները՝ տեսանյութում։
