07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Կոմիտասի թանգարան-ինստիտուտը բազմաբնույթ ծրագրով կմիանա «Թանգարանների գիշեր»-ին
Մշակույթ
17.05.2023 | 13:15
Կոմիտասի թանգարան-ինստիտուտն ավանդույթի համաձայն միանալու է «Թանգարանների գիշեր» միջոցառմանը և մայիսի 20-ին արվեստասերներին է ներկայանալու բազմաբնույթ ցուցադրություններով ու համերգներով:
«Արմենպրես»-ի հաղորդմամբ՝ այցելուների համար 11:00-24:00-ն բաց կլինեն մշտական ցուցադրությունն ու «Դարից երկար. Արշակ Չոպանյան-Կոմիտաս» ժամանակավոր ցուցադրությունը:
12:00-ին տեղի կունենա «Ողջույն ձեր նոր կյանքին» համերգը: Ելույթ կունենա Մայր Աթոռ Սուրբ Էջմիածնի և ՀԲԸՄ Նորքի Հայորդյաց Տան «Շողակաթ» մանկական երգչախումբը, որի խմբավարը Կարինե Եզեկյանն է, դաշնակահարը՝ Գայանե Ներսիսյանը:
14:00-ին կանցկացվի «Ձայնիկ ունիմ» կրթական ծրագիրը: Այն կվարի Աստղիկ Մարտիրոսյանը, իսկ 16:00-ին Մարիաննա Տիգրանյանը կներկայանա «Կանաչացավ ծառն ի խընկին». հայ ավանդական հարսանիքը» բանախոսությամբ:
18:00-ին պարատոն է սպասվում «Մենք» ազգային պարի խմբի հետ: Պարուսույցը Ստեփան Թորոյանն է, իսկ 20:00-ին համերգային ծրագրով հանդես կգա «Գեղարդ» երգեցիկ խումբը, որի գեղարվեստական ղեկավարը Մհեր Նավոյանն է, խմբավարը՝ Անահիտ Պապայանը:
Բոլոր միջոցառումների մուտքն ազատ է։
