Խնդրելու եմ երկրի նախագահին սկսել քաղաքական կոնսուլտացիաներ. Արցախի ԱԺ նախագահ

«Արցախում այս պահին կան 120 հազար հայրենապաշտ մարդիկ, որովհետև հայրենիքը պաշտողը կարող է այստեղ ապրել: Այս մասին այսօր Ստեփանակերտում՝ «Միասնական հայրենիք» կուսակցության նախագահ, խորհրդարանական երկրորդ ուժի առաջնորդ Սամվել Բաբայանի նախաձեռնած հանրային հավաքի ժամանակ հայտարարեց Արցախի ԱԺ նախագահ Արթուր Թովմասյանը:

Հայրենասեր մարդիկ այն արցախցիներն են, որոնք ապրում են Արցախի սահմաններից դուրս, և Արցախը չեն մոռանում: Աշխարհում ապրում է մոտ 2 միլիոն արցախցի, բայց այստեղ է 120 հազարը: Ես ամեն ինչ անելու եմ, որ մեր հասարակության մեջ բևեռներ չառաջանան: Հույսն ու հավատը գործի կեսն է: Եթե մենք հավատում ենք, որ այս սուրբ հողը պետք է հայկական պահենք,և այստեղ հայեր պիտի ապրեն, ապա մենք պետք է համերաշխ ու հանդուրժող լինենք:

Եթե մեզ լքի համերաշխությունն ու հանդուրժողականությունը, ապա մենք կորցնելու ենք Արցախը, և դրա պատասխանատուները ցանկացած հարահավաքի առաջնորդներ»,- հայտարարեց Արթուր Թովմասյանը: Նա հավելեց, որ հանրահավաքի մասնակիցների պահանջները ինքը կներկայացնի Արցախի նախագահ Արայիկ Հարությունյանին։

«Այսօրվանից՝ այս վայրկյանից,ես հայտարարում եմ քաղաքական կոնսուլտացիաներ: Խնդրելու եմ գործող նախագահին, որպեսզի սկսի այդ քաղաքական կոնսուլտացիաները: Եթե քաղաքական կոնսուլտացիաներից հետո արցախյան քաղաքական ուժը, որը երկրորդն էր Խորհրդարանում, չբավարարի, ապա դուք կարող եք սրանից ավելի հուժկու հանրահավաքներ անել և ասել, որ համաձայն չեք:
Ես ծանոթ եմ Սամվել Բաբայանի ճանապարհային քարտեզին, մյուս կողմի ճանապարհային քարտեզին, թե որն է իրատեսականը, դա կանենք մեր քննարկումների ժամանակ»,- նշեց Թովմասյանը։

Անդրադառնալով Ադրբեջանի և Հայաստանի տարածքային ամբողջականության ճանաչման հարցին՝ Թովմասյանն ասաց. «Միշելն Ալիևի և Փաշինյանի հետ խոսել է նախկին Լեռնային Ղարաբաղի ինքնավար մարզի, նրա ժողովրդի անվտանգության և իրավունքի մասին, ոչ թե ինքնորոշման իրավունքի մասին. դա Շարլ Միշելի կարծիքը չէ, դա Արևմուտքի հավաքական կարծիքն է: Արցախի հիմնախնդրի լուծման բանալին տրված է ԵԱՀԿ Մինսկի խմբի համանախագահող երկրներին, Ռուսաստանի Դաշնության կարծիքը նույնպես պարզ է: Հնչում է, որ գործ չենք անում, գիշերս ու ցերեկս խառնվել են իրար, ինչպես թե՝ չենք անում։ Եկեք միասին տեսնենք ինչ ենք անում»:

Մանրամասները՝ տեսանյութում։