16.05.2026 | 17:02
Մայիսի 17-ից օդի ջերմաստիճանը կբարձրանա
Բաքուն շարունակում է ագրեսիան․ ինչ նպատակ է հետապնդում Ալիևը բանակցություններից առաջ․ ՏԵՍԱՆՅՈՒԹ
Քաղաքականություն
12.05.2023 | 20:39
Մայիսի 12-ին ադրբեջանական կողմը շարունակել է թիրախավորել հայկական դիրքերը Գեղարքունիքի մարզի Սոթք գյուղի ուղղությամբ։ Հայաստանի պաշտպանական գերատեսչությունը հայտնում է Ադրբեջանի ԶՈՒ-ի կողմից կիրառված ԱԹՍ-ի մասին, որի հարվածի հետևանքով 2 զինծառայող է վիրավորվել։ Նրանց կյանքին վտանգ չի սպառնում։
ԱԺ ընդդիմադիր «Հայաստան» խմբակցության պատգամավոր Գառնիկ Դանիելյանը, որը երեկ այցելել է Սոթք գյուղ, նշում է՝ արկերը պայթում էին գյուղից հարյուր-երկու հարյուր մետր հեռավորության վրա։
Ադրբեջանական զինուժն այսօր կրակել է նաև Կութ գյուղի դիրքերի ուղղությամբ․ սահմանային այս լարմանը զուգահեռ՝ ընդամենը 2 օրից Բրյուսելում սպասվում է Փաշինյան-Միշել-Ալիև եռակողմ հանդիպում։ Հայաստանի ԱԳ նախարարի տեղակալ Պարույր Հովհաննիսյանի խոսքով՝ սա ադրբեջանական կողմի մշտական ձեռագիրն է։
Քաղաքագետ Տիգրան Գրիգորյանի խոսքով՝ Հայաստանի և Ադրբեջանի միջև խաղաղության օրակարգին առնչվող տարաձայնությունները շարունակում են առանցքային տեղ զբաղեցնել։ Այս փուլում քաղաքագետը շանս չի տեսնում, որ Բաքուն և Երևանը կարողանալու են մերձեցնել իրենց դիրքորոշումները։
Բրյուսելից հետո կես ամիս անց ևս մեկ հանդիպում է ակնկալվում Քիշնևում։ Բանակցային այս գործընթացում նախատեսվում է ոչ միայն ԵՄ Խորհրդի նախագահ Շառլ Միշելի, այլև Ֆրանսիայի նախագահի և Գերմանիայի կանցլերի մասնակցությունը։
Չնայած ԵՄ Խորհուրդն օրեր առաջ հայտարարել, իսկ այսօր էլ վերահաստատել է հանդիպման պայմանավորվածության վերջնական լինելը, Ալիևի վարչակազմից շարունակում են նշել, որ վերջնական որոշում չունեն։ Տիգրան Գրիգորյանի խոսքով՝ Ալիևը չի ցանկանում, որ բանակցային գործընթացին մասնակցեն ԵՄ ազդեցիկ պետությունների ղեկավարները, որպեսզի հետագայում ճնշումներով չպարտադրեն կատարել ստանձնած պարտավորությունները։
Պաշտոնական Երևանը շատ փոքր է գնահատում հավանականությունը, որ այս հանդիպումների արդյունքում հնարավոր կլինի հասնել Ադրբեջանի հետ խաղաղության պայմանագրի ստորագրման։
Մանրամասները՝ տեսանյութում։
Նարեկ Կիրակոսյան
