03.10.2026 | 19:01
Կադիրովը Ռուսաստանում ստացել է բարձրագույն զինվորական կոչումը, ոսկեգույն ուսադիրներ և կարմիր բերետ. ТАСС
Սերժ Սարգսյանի գործով մեղադրյալը հայտարարեց, որ Սերգո Կարապետյանն իրեն զանգել ու ասել է` ինչ բովանդակությամբ ցուցմունք տա
Հասարակություն
11.05.2023 | 15:26
Հայաստանի երրորդ նախագահ Սերժ Սարգսյանի և մյուսների գործով դատարանը հասել է ամբաստանյալների հարցաքննության փուլին: Այսօր դատարանում ցուցմունք է տալիս գործով մեղադրյալ Գևորգ Հարությունյանը:
Վերջինս դեռևս բովանդակային ցուցմունք չի տվել, բայց հայտարարեց, որ գործի սկզբնական փուլում` Գյուղատնտեսության նախկին նախարար Սերգո Կարապետյանն իրեն զանգել ու ասել է, թե ինչ բովանդակության ցուցմունք տա: Ըստ վկայի` Կարապետյանն իրեն նաև ասել է, որ եթե փոխհատուցեն քրեական գործով ենթադրյալ վնասը, պատասխանատվության չեն ենթարկվի: Այս մեղադրյալը գործի քննության ընթացքում առաջին անգամ է նման հայտարարություն անում` թեև նախկինում 5 անգամ հարցաքննվել է նախաքննության փուլում:
Նշենք, որ Սերգո Կարապետյանը մահացել է, ստացվում է` մեղադրյալը միայն նրա մահվանից հետո է Կարապետյանի վերաբերյալ նման տեղեկություն հայտնում: Դատախազի հարցին, թե ինչո՞ւ է հիմա խոսում այդ մասին, Հարությունյանն ասաց թե անհարմար է զգացել նախկինում ասել:
Նշենք, որ Հարությունյանը եղել է Գյուղատնտեսության նախարարության Բուսաբուծության վարչության պետը, նա մեղադրվում է նախկին Քրեական օրենսգրքի 38-179-րդ հոդվածի 3-րդ մասի 1-ին կետով (առանձնապես խոշոր չափերով յուրացումը կամ վատնումը կազմակերպելը, դրդելը, օժանդակելը):
Արաքս Մամուլյան
