Թուրքիայի կուսակցություններից մեկը Էրդողանի և նրա գործընկերների դեմ հայց է ներկայացրել կոռուպցիայի ու չարաշահումների վերաբերյալ

Թուրքիայի Ժողովրդական ազատագրական կուսակցությունը (HKP) հայց է ներկայացրել նախագահ Ռեջեփ Թայիփ Էրդողանի և նրա մերձավորների դեմ՝ 2007 թվականին օդանավակայանի շահագործման մրցույթում կոռուպցիայի և չարաշահումների համար, գրում է Gercek news-ը։

Կոռուպցիոն կապերը բացահայտվել են Ալի Յեշիլդաղի կողմից՝ թուրքական Media Group-ի սեփականատեր Հասան Յեշիլդաղի եղբոր, որը նախագահ Էրդողանի ամենավստահելի աջակիցներից է։ Յեշիլդաղն այդ մասին պատմել է պետական պաշտոնյաների և նրանց համախոհների կողմից կոռուպցիայի ու ապօրինությունների մասին տեսանյութերի շարքում:

Նա պնդում է, որ 2007 թվականին Թուրքիայի հարավային Անթալիայի օդանավակայանի գործունեության մրցույթի ընթացքում Էրդողանը և նրա մերձավորները համաձայնվել են փաստաթղթեր գողանալ Celebi Holding-ի թղթապանակից, ինչը հանգեցրել է նրանց հայտի որակազրկման և ապահովել, որ IC Investment Holding-ը շահի մրցույթը: Յեշիլդաղը նաև պնդում է, որ Էրդողանն անձամբ 1 միլիարդ դոլար է ստացել կոռուպցիոն սխեմային իր մասնակցության համար։

HKP-ի փաստաբաններն Էրդողանին ու նրա երեք համախոհներին՝ Ալի Իհսալ Արսլանին, Իբրահիմ Ջեջեին և Հասան Յեշիլդաղին մեղադրում են հանցավոր կազմակերպություն ղեկավարելու, մրցութային գործընթացը շահարկելու, կաշառք ստանալու, ազդեցության առևտրով զբաղվելու և իրենց պաշտոնական պարտականությունները չարաշահելու համար։

Յեշիլդաղն իր տեսանյութերում նաև այլ պաշտոնյաների կոռուպցիոն գործունեության հետ կապված բացահայտումներ է արել։

Էմմա Չոբանյան