16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Թուրքիայում ընտրությունների նախաշեմին ընդդիմության գրասենյակները հարձակումների են ենթարկվում
Քաղաքականություն
08.05.2023 | 20:12
Թուրքիայի համապետական ընտրություններին ընդառաջ՝ շարունակվում են ընդդիմության գրասենյակների վրա հարձակումները։ Ժողովրդահանրապետական կուսակցության (CHP) Շանլըուրֆայի պատգամավորության թեկնածու Մահմութ Թանալը հայտարարել է, որ փամփուշտներ են արձակվել կուսակցության նախընտրական գրասենյակի վրա՝ «ընդդիմությանը սպառնալու նպատակով», գրում է Duvar-ը։
Թվիթերյան իր էջում Թանալը հայտնել է, որ պատռել են նաև CHP-ի առաջնորդ և ընդդիմադիր դաշինքի նախագահի թեկնածու Քեմալ Քըլըչդարօղլուի, ինչպես նաև փոխնախագահների թեկնածուներ Էքրեմ Իմամօղլուի և Մանսուր Յավաշի պատկերներով պաստառները։
«Դուք (իշխանությունը) ձեր լիազորությունները վերցնում եք սադրիչներից։ Մյուս կողմից՝ մենք մեր իշխանությունը վերցնում ենք Աստծուց և ազգից։ Մենք ձեզանից չենք վախենում, մենք միշտ դաշտում ենք լինելու: CHP-ն պատմություն կգրի Շանլըուրֆայում»,- գրել է նա՝ կիսվելով գրասենյակի ներսում փամփուշտների և վնասված պաստառների նկարներով:
Հավելենք, որ նախօրեին Էրզրումում իշխանությունների կողմակիցների կողմից քարերով հարձակում էր տեղի ունեցել Ստամբուլի ընդդիադիր քաղաքապետ Էքրեմ Իմամօղլուի ավտոբուսի վրա։ Իմամօղլուն հանրահավաք էր անցկացրել, որի ընթացքում քարեր էին նետվել մասնակիցների և ընդդիմության ներկայացուցիչների ուղղությամբ։ Հարձակման հետևանքով 17 մարդ է տուժել։
Նշենք, որ ապրիլի սկզբին էլ հարձակում էր իրականացվել Ժողովրդահանրապետական կուսակցության Ստամբուլի գրասենյակի վրա, իսկ մինչ այդ՝ մարտի 31-ին զինված հարձակման էր ենթարվել մեկ այլ ընդդիմադիր՝ IYI կուսակցության Ստամբուլի գրասենյակը։
Էմմա Չոբանյան
