08.10.2026 | 14:53
Թուրքական պաշտպանական ընկերությունը փակում է Ադրբեջանում իր մասնաճյուղը
«Հայը՝ ջազում, ջազը՝ բակում». Գյումրիում մեկնարկեց HAY-AT JAZZ ամենամյա ջազային փառատոնը
Մշակույթ
05.05.2023 | 11:29
Գյումրու ժողովրդական ճարտարապետության և քաղաքային կենցաղի թանգարանի բակում MALKHAS JAZZ BAND-ի համերգային ծրագրով մայիսի 4-ին ազդարարվեց HAY-AT JAZZ ամենամյա ջազային փառատոնի մեկնարկը: Ինչպես տեղեկացնում է «Արմենպրես»-ը, 4 օր շարունակ գյումրեցիներն ու քաղաքի հյուրերը տարբեր թանգարանների բակերում հնարավորություն կունենան վայելելու ջազային մեղեդիրները:
Ջազային բակերի ընտրությունը պատահական չէ: Ջազը կհնչի Հովհ. Շիրազի և Ավ. Իսահակյանի տուն-թանգարանների, Ասլամազյաններ քույրերի պատկերասրահի, Ժողովրդական ճարտարապետության ու կենցաղի թանգարանի, նույն Ձիթողցոնց տուն-թանգարանի բակերում: «HAY-AT JAZZ առաջին անգամ իրականացրել ենք 2016 թվականին: Ընդմիջում ունեցել ենք միայն 2018 և 2021 թվականներին: Այս տարի փառատոնն իրականացվում է ՀՀ ԿԳՄՍՆ ֆինանսավորմամբ: Փառատոնի ձևաչափն ամբողջովին նույնն է, ինչ անցած տարիներին»,-«Արմենպրես»-ին տեղեկացրեց Գյումրու քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանը:
Ի տարբերություն նախորդ տարիների, այս տարի փառատոնի կազմակերպիչները ջազային փառատոնը մի փոքր ուշ սկսեցին եղանակային անբարենպաստ պայմանների պատճառով: «Հիմնականում փառատոնը սկսում էինք ջազի միջազգային օրը, սակայն այս տարի եղանակային պայմանների, ապա նաև նույն օրը՝ Երևանում ջազային միջոցառումների պատճառով մի փոքր ուշ սկսեցինք՝ հնարավորություն տալով հանդիսատեսին և երաժիշտներին մասնակիցը լինելու և՛ Երևանում, և՛ Գյումրիում անցկացվող միջոցառումներին: Այս փառատոնն այլևս քաղաքացիություն ստացած միջոցառում է ու վստահ եմ, որ երկար է ապրելու Գյումրիում ու միշտ պահանջված է լինելու: Մեր եզակիությունը փառատոնը թանգարանների բակերում անցկացնելն է»,-նշեց Լիլիթ Թովմասյանը՝ հույս հայտնելով, որ ինչպես նախկինում, հետագայում ևս մարդիկ իրենց այցը Գյումրի կպլանավորեն նաև ջազային այս փառատոնի շնորհիվ:
MALKHAS JAZZ BAND-ը համերգի ավարտին պարգևատրվեց Գյումրու քաղաքապետարանի պատվոգրով: «Ես Գյումրիում ամեն անգամ ինձ շատ լավ եմ զգում՝ ասես մեր ակումբում լինեմ՝ շատ ջերմ ու հետաքրքիր միջավայր է, եղանակն էլ՝ հրաշալի: Ամեն անգամ մեծ ոգևորություն եմ զգում՝ շատ հետաքրքիր ու միևնույն ժամանակ շատ բարդ ջազային էներգետիկա կա Գյումրիում»,-համերգից հետո «Արմենպրես»-ին ասաց ՀՀ ժողովրդական արտիստ, ջազմեն, կոմպոզիտոր Լևոն Մալխասյանը:
Նախագիծն իրականացվում է ՀՀ ԿԳՄՍՆ ֆինանսավորմամբ։ Նախագծի հեղինակն է «Մանուկյան ընկերությունը», իրականացնող՝ «I LINK» ՀԿ-ն: Փառատոնի անցկացմանը աջակցել է նաև Գյումրու քաղաքապետարանը:
