Չկա որևէ փաստաթուղթ, որտեղ կֆիքսվի՝ ինչպես պետք է հակազդել արտաքին ապատեղեկատվությանը. փորձագետ․ ՏԵՍԱՆՅՈՒԹ

Հանրային լրագրության ակումբը կազմակերպել է «Պայքար ապատեղեկատվության և քարոզչության դեմ․ երկխոսություն դրանց դիմակայության ռազմավարությունների շուրջ Հայաստանում և դրա սահմաններից դուրս» խորագրով համաժողովը։ Համաժողովն անցկացվում է ՀԼԱ «Մեդիա և տեղեկատվական գրագիտության աքսելերատոր» ծրագրի շրջանակում, որն իրականացվում է ԱՄՆ պետքարտուղարության Հանրային դիվանագիտության գրասենյակի ֆինանսական աջակցությամբ։

համաժողովի նպատակն է երկխոսություն ծավալել միջազգային և հայաստանյան հեղինակավոր փորձագետների, ոլորտային մասնագետների, քաղաքական գործիչների, լրատվամիջոցների և քաղաքացիական հասարակության ներկայացուցիչների միջև՝ քննարկելու ապատեղեկատվության մարտահրավերները, քարոզչական ժամանակակից մեթոդներն ու նոր տեխնոլոգիաների ազդեցությունը մանիպուլյացիաների ու քարոզչության սփռման գործում։

ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի տնօրեն Գոռ Ծառուկյանը համաժողովի ընթացքում ընդգծեց, որ ապատեղեկավության տարածումը լրջագույն խնդիր է։

Արձանագրելով, որ կա խնդիր թե՛ ռազմավարական հաղորդակցման, թե՛ ապատեղեկատվության դեմ պայքարի ոլորտում՝ Ծառուկյանը հայտնեց, որ «Հանրային կապերի և տեղեկատվության կենտրոնը» հանձն է առել տարբեր ուղղություններով բարեփոխումների անցկացման նախագծեր մշակել և իրականացնել:

«Կառավարությունը կարևորում է և պատրաստվում է քայլեր ձեռնարկել ապատեղեկատվության դեմ պայքարում քաղաքացիական հասարակության և միջազգային գործընկերների հետ համագործակցության ինտենսիվացման և հասարակության մեդիագրագիտության բարձրացման ուղղություներով»,- ասաց Ծառուկյանը:

Փորձագետի դիտարկմամբ՝  դեռևս չկա որևէ փաստաթուղթ, որտեղ կֆիքսվի՝ ինչպես պետք է հակազդել արտաքին ապատեղեկատվությանը։

Մանրամասները՝ տեսանյութում։