«Հինգ-վեց թուրք ավտոմատներով մոտեցել են ծնողներիս»․ ինչ է տեղի ունեցել Լաչինի անցակետում. ՏԵՍԱՆՅՈՒԹ

Լաչինի միջանցքում ապօրինի անցակետ տեղադրելուց մեկ շաբաթ անց ադրբեջանական կողմը երեկ տեսանյութ տարածեց՝ տպավորություն ստեղծելով, թե անցակետը, իբր, բնականոն գործում է։ Հրապարակված քարոզչական այդ տեսանյութով Բաքուն փորձում է ցույց տալ, թե, իբր, քաղաքակիրթ պետություններին բնորոշ վերաբերմունք է դրսևորում արցախցիների հանդեպ։ Սակայն ադրբեջանական անցակետով անցած արցախցիների հարազատները բոլորովին այլ իրականություն են ներկայացնում։ Նրանցից մեկը Factor TV-ի հետ զրույցում ասաց, որ իրենց հոգեբանական բռնության են ենթարկել՝ հայկական բնակավայրերին ադրբեջանական անուններ տալով։

Ադրբեջանական անցակետով հարկադրված անցնողները Շուշիի շրջանի գյուղերի բնակիչներ են։ Լիսագորից յոթ բնակիչ է եղել, այդ թվում՝ գյուղապետը։ Նրա հետ կապ հաստատել չհաջողվեց, իսկ լիսագորցիներից մեկը, որի հայրն ու մայրը Գորիս էին գնացել՝ կենսական նշանակության սննդամթերք ձեռք բերելու, նշեց, որ ադրբեջանցի սահմանապահները զենքերը հատուկ ի ցույց դնելով մոտեցել են անզեն արցախցիներին։

Արցախի նախագահի խորհրդական Դավիթ Բաբայանն անցակետի տեղադրումն ու անօրինական ստուգումները «խայտառակություն» է որակում, իսկ տեսանյութի հրապարակումը՝ ադրբեջանական նացիստական քարոզչություն։

Ադրբեջանի սահմանապահ ծառայության աշխատակիցների կեղծ բարեպաշտության ֆոնին հիշարժան է դառնում ապրիլի սկզբին տեղի ունեցած միջադեպը, երբ ադրբեջանցի, այսպես կոչված, բնապահպանները երեք տասնյակի հասնող խաղաղ բնակիչների, որոնց թվում երեխաներ ու կանայք էին, անցակետում այնպիսի հոգեբանական ճնշումների էին ենթարկել, որ նրանցից մի քանիսն ուշաթափվել էին։

Ավելի վաղ էլ՝ հունվարի 18-ին, դիմակավորված ադրբեջանցիները ներխուժել էին երեխաներին Գորիսից Ստեփանակերտ տեղափոխող ավտուբուս։ Երեխաներից մեկն ուշաթափվել էր։ Նման դեպք տեղի էր ունեցել նաև 2021-ին, երբ այս անգամ էլ զինված ադրբեջանցիները երեխաներին տեղափոխող ավտոբուսի վրայից փորձել էին ջնջել «Արցախ» գրությունը։ Ադրբեջանի կողմից արցախահայության նկատմամբ ցեղասպան քաղաքականության օրինակները բազմաթիվ են․ գրեթե ամեն օր ադրբեջանցի զինվորականները թիրախավորում են դաշտերում աշխատող խաղաղ բնակիչներին։

Ռուս խաղաղապահ զորախմբի պատասխանատվության գոտում անօրինական անցակետի տեղադրումից մեկ շաբաթ անց Արցախի նախագահին կից հակաճգնաժամային խորհրդի նախագահ Տիգրան Պետրոսյանը հայտնում է, որ զրոախմբի նոր հրամանատար Ալեքսանդր Լենցովը մեկնելու է Բաքու՝ բանակցությունների։

Արցախի նախագահի աշխատակազմից այս տեղեկությունների վերաբերյալ մեկնաբանություն ստանալ չհաջողվեց, իսկ նախագահի խորհրդական Դավիթ Բաբայանը նշում է, որ ռուսական կողմին բազմաթիվ հարցեր ունեն։

Խորացող խնդիրների ֆոնին Ստեփանակերտի մի խումբ բնակիչներ հավաք են անցկացրել։ Նրանք պահանջում են իշխանություններից դիմել ՄԱԿ-ի ԱԽ՝ միջազգային դիտորդներ տեղակայելու համար։

Նշենք, որ արդեն մեկ շաբաթ է անցել, բայց Արցախում անվտանգության երաշխավոր համարվող ռուսական կողմը պաշտոնապես որևէ քննադատություն չի հնչեցրել Ադրբեջանի՝ լարվածությունը խորացնող, խաղաղության գործընթացը տապալող գործողություններին։

Մանրամասները՝ տեսանյութում։

Նարեկ Կիրակոսյան