ՆԳՆ փոխնախարարն անդրադարձավ «Պոլիգրաֆ» ակումբում Ոստիկանության կողմից ենթադրյալ բռնության դեպքին․ ՏԵՍԱՆՅՈՒԹ

2023 թվականը ոստիկանության համար թմրամիջոցների շրջանառության դեմ պայքարի տարի է։ Ազգային ժողովի արտահերթ նիստում այս մասին հայտարարեց ներքին գործերի փոխնախարար Արփինե Սարգսյանը` անդրադառնալով երևանյան ակումբներից մեկում իրականացված հատուկ օպերացիային։
Նշենք, որ սոցցանցերում մի տեսանյութ էր տարածվել, ըստ որի` ապրիլի 22–ի լույս 23-ի գիշերը ոստիկանությունը հատուկ օպերացիա է իրականացրել Երևանի «Poligraf» ակումբում։ Ակումբն իր ֆեյսբուքյան էջում հայտարարել էր, որ բոլորին պառկեցրել են հատակին և բռնի ուժով տարել ոստիկանական բաժանմունք։ Ավելին, աշխատակազմն ու այցելուները ենթարկվել են դաժան ծեծի և խուզարկության համար մերկացվել ոստիկանության բաժնում։

Սարգսյանի խոսքով՝ թմրամիջոցների շրջանառության դեմ պայքարի ուղղությամբ ինտենսիվ աշխատանքներ են իրականացվում ոստիկանության բոլոր ստորաբաժանումների կողմից․ «Ակումբները ևս բացառություն չեն, որովհետև փորձը ցույց է տալիս, որ հատկապես նման հաստատություններում թմրամիջոցների շրջանառության ռիսկը շատ ավելի բարձր է»,- նշեց փոխնախարարը։

Անդրադառնալով լուրերին, թե ոստիկանների կողմից բռնություն է կիրառվել ակումբներից մեկում իրականացված օպերացիայի ժամանակ, ՆԳ փոխնախարարը նշեց, որ պետք է պարզել` անհամաչափ ուժի կիրառում եղել է, թե ոչ։

«Հիմա կդժվարանամ ասել՝ համաչա՞փ է եղել ուժի կիրառումը կամ եղե՞լ է, թե՞ ոչ։ Վստահեցնում եմ, որ ցանկացած դեպքում ունենում ենք հաղորդումներ և համապատասխան արձագանք է լինում»,- նշեց Սարգսյանը՝ վստահեվնելով, որ եթե հիմքեր լինեն ծառայողական քննության, ապա դա ևս կիրականացվի։

Մանրամասները՝ տեսանյութում։