Հրդեհի վայրում ծնողների մասնակցությամբ կարևոր քննչական գործողություն է իրականացվել․ Նորայր Նորիկյան․ ՏԵՍԱՆՅՈՒԹ

Ազատ գյուղի զինվորական կացարանում հրդեհի հետևանքով զոհված զինծառայողների ծնողները այսօր վաղ առավոտից փակել էին Կառավարության շենքին հարակից փողոցները՝ պահանջելով հանդիպում վարչապետ Նիկոլ Փաշինյանի և պաշտպանության նախարար Սուրեն Պապիկյանի հետ։ 15 զինծառայողներից 13-ի մերձավոր ազգականների լիազոր ներկայացուցիչ, փաստաբան Նորայր Նորիկյանը Factor TV-ին փոխանցեց, որ մի քանի օր առաջ ծնողների մասնակցությամբ հրդեհի վայրում կարևոր քննչական գործողություն է տեղի ունեցել, սակայն ձեռնպահ է մնում մանրամասներ հանրայնացնել։

«Ակնհայտ է, որ 3 ամիսների ընթացքում որևէ արդյունավետ քայլ չի արվել գործի ամբողջական բացահայտման ուղղությամբ։ Ավելի շատ հարցեր են առաջացել, քան տրվել են պատասխաններ։ Ավելի շատ հարցեր առաջացրին դիակների դատաբժշկական փորձաքննության եզրակացությունները։ Տուժող կողմը քննարկում է լրացուցիչ կամ կրկնակի դատաբժշկաական փորձաքննություն անցկացնելու հնարավորությունը», – ասաց Նորայր Նորիկյանը։

Նորիկյանի խոսքով՝ զոհված զինծառայողների հարազատները դժգոհ են նախաքննության ընթացքից և արդյունավետությունից։

«Չկա վստահություն, և այն աշխատանքները, որոնք իրականացվում են, դեռևս լույս չեն սփռում գործի ամբողջական պատկերի վրա։ Հակասում են հրապարակային փաստական տեղեկությունները, գործի շրջանակներում ցուցմունք տված անձանց ցուցմունքները։ Ըստ էության, գործ ունենք մի իրավիճակի հետ, երբ հիմա գիտենք այնքան, ինչքան գիտեինք հունվարի 19-ին», – ասաց Նորիկյանը։
Մանրամասները՝ տեսանյութում։

Անի Թամրազյան