Կգամ, կփակեմ ձեր տան դռները, կասեմ՝ քաղաքական ակցիա է. Արմեն Խաչատրյան

«Սահմանադրական նորմեր կան, որոնք պետք է պահպանվեն և առաջինը այս դահլիճում պետք է պահպանվեն: Եթե մարդը ԱԺ ամբիոնում ասում է՝ ես թույլ չեմ տալիս ուրիշ ոչ մեկը ելույթ ունենա այս ամբիոնից, դրանով խախտում է բոլորի սահմանադրական իրավունքները»,- այս մասին ԱԺ-ում լրագրողների հետ զրույցում նշեց «Քաղաքացիական պայմանագիր» խմբակցության պատգամավոր Արմեն Խաչատրյանը՝ անդրադառնալով հարցին, թե երեկ ԱԺ նախագահի գործողությունները, երբ բռնի ուժով հրամայեց հեռացնել քաղաքական ակցիա անող Թագուհի Թովմասյանին և ընդդիմադիր այլ պատգամավորների, ինչքանո՞վ է իրավաչափ գնահատում՝ հաշվի առնելով, որ այս իշխանությունները հեղափոխություն իրականացնելիս ևս նման ակցիա են իրականացրել ԱԺ-ում։

Դիտարկմանը, որ պատգամավորը քաղաքական ակցիա էր իրականացնում, Խաչատրյանը հակադարձեց՝ ասելով․ «Քաղաքական ակցիան ավարտվում է այնտեղ, որտեղ սկսում են ուրիշի իրավունքները»:

Անդրադառնալով դիտարկմանը, որ քաղաքական ակցիայի շրջանակներում ՔՊ-ականները դատարանների դռները փակում էիք և ասում՝ չպետք է մտնեք, և հարցին, թե այդ դեպքում դատավորների իրավունքները չէի՞ն խախտվում, Արմեն Խաչատրյանը պատասխանեց. «Մի րոպե, հիմա ես ամեն օր քաղաքական ակցիա կանեմ, կգամ ձեր տան դուռը կփակեմ, կասեմ՝ դուրս չպետք է գաք:

Ցանկացած քաղաքական ակցիա անելու ազատությունների, իրավունքների սահմանը ավարտվում է այնտեղ, որտեղից սկսում են այլոց իրավունքները․․․ Իրավունքի գերակայություն պետք է լինի»:

Մանրամասները՝ տեսանյութում։