16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Արամ Նիկոլյանին արգելում են մուտք գործել Հանրային հեռուստաընկերություն և պետական պահպանվող այլ կառույցներ
Հասարակություն
21.04.2023 | 12:10
Դիզայներ Արամ Նիկոլյանին, որն օրեր առաջ Հայաստանում անցկացվող ծանրամարտի Եվրոպայի առաջնության բացման ժամանակ այրել էր Ադրբեջանի դրոշը, արգելում են մուտք գործել Հանրային հեռուստաընկերություն, որտեղ նա աշխատում է։ Նիկոլյանի մուտքն արգելված է նաև պետական այլ կառույցներ, որտեղ պետական պահպանություն է իրականացվում ոստիկանների կողմից։ Այս մասին հայտնում է Նիկոլյանի ներկայացուցիչ Ալեքսանդր Կոչուբաևը։ Վերջինս Factor․am-ի զրույցում ասաց, որ Նիկոլյանի մուտքն արգելվել է նաև Խնկո Ապոր անվան գրադարան, ոստիկաններն իրենց հայտնել են, որ Նիկոլյանի մուտքը պահպանվող տարածքներ արգելում են ղեկավարության ցուցումով, Հանրային հեռուստաընկերությունից էլ հայտնել են, թե իրենք չեն արգելել Նիկոլյանի մուտքը։ Ըստ ներկայացուցչի՝ Նիկոլյանն ազատված չէ Հանրային հեռուստաընկերությունում աշխատանքից։
Հանրային հեռուստաընկերության տնօրեն Հովհաննես Մովսիսյանը թեև մեր հեռախոսազանգին պատասխանեց, սակայն ստեղծված իրավիճակի վերաբերյալ որևէ պարզաբանում չտվեց՝ առաջարկելով դիմել Հանրային հեռուստաընկերության հանրային և միջազգային կապերի տնօրեն Աննա Օհանյանին, որը հեռախոսազանգերին չի պատասխանում։
Թեմայի վերաբերյալ պարզաբանում չտվեց նաև Ոստիկանությունը․ լրատվական ծառայությունից նախ առաջարկեցին դիմել Հանրային հեռուստաընկերությանը, ապա առաջարկեցին գրավոր հարցում ուղարկել։
Արաքս Մամուլյան
