Քաղաքականություն
25.06.2018 | 10:43
Թուրքիայի գերագույն ընտրական հանձնաժողովի ղեկավար Սադի Գյուվենան հայտարարել է, որ երկրի նախագահ Ռեջեփ Թայիփ Էրդողանը նախագահական ընտրություններում ստացել է ձայների բացարձակ մեծամասնությունը. փոխանցում է ria.ru-ն:
Ըստ քվեաթերթիկների տվյալների մշակման 98%-ի արդյունքների՝ Էրդողանը ստացել է 52,5% ձայն, նրա հիմնական մրցակից Ինջեն հավաքել է 30,7% քվե, Դեմիրթաշը – 8.4%:
Նշենք, որ Թուրքիայում նախագահական և խորհրդարանական ընտրությունները միաժամանակ էին անցկացվում, և խորհրդարանական ընտրություններում հաղթել է իշխող՝ «Արդարություն և զարգացում» կուսակցությունը՝ հավաքելով 42,4% ձայն:
Ընդգծենք, որ մեջլիսում կլինեն հայազգի երկու պատգամավոր՝ քրդամետ «Ժողովուրդների դեմոկրատական կուսակցության» կողմից առաջադրված Կարո Փայլանը և իշխող «Արդարություն և զարգացում» կուսակցության կողմից առաջադրված Մարգար Եսայանը: Քեմալական Հանրապետական ժողովրդական կուսակցության անդամ Սելինա Դողանի թեկնածությունն այս ընտրություններում կուսակցությունը չէր առաջադրել:
