16.01.2026 | 09:26
Միջպետական և հանրապետական նշանակության ավտոճանապարհները բաց են
10 տարեկանների 33 տոկոսը գրագիտության խնդիր ունի, ի՞նչ է արել ԿԳՄՍՆ-ն նրանց համար. Լարիսա Մինասյան․ ՏԵՍԱՆՅՈՒԹ
Հասարակություն
31.03.2023 | 13:00
Հայաստանում 10 տարեկանների 33 տոկոսը գրագիտության խնդիր ունի․ 4 տարի դպրոց հաճախելուց հետո նրանք անգրագետ են։ Այս մասին «Հանուն ոչնչի՞. պետության ստացած դրամաշնորհային աջակցությունը կրթության բարեփոխումների համար» թեմայով այսօր հրավիրված քննարկման ժամանակ հայտնեց ֆիզմաթ գիտությունների թեկնածու, անկախ փորձագետ Լարիսա Մինասյանը։
Նրա խոսքով՝ 18-21 տարեկանների 10 տոկոսը երեք տարի առաջ ունեցել է նույն խնդիրը․ «Սակայն նրանք ունեն միջնակարգ կրթության ավարտական վկայական։ 12 տարի շարունակ նրանք դասարանից դասարան են տեղափոխվել․ նրանց հիմնարար՝ կրթություն ստանալու իրավունքը խախտվել է և նրանց ապագան որոշակի է՝ միանշանակ կապ կա անգրագիտության և աղքատության միջև»։
«Ակնհայտ է, որ առկա է չսանձված կոռուպցիա, երեխաների հիմնարար իրավունքը խախտելու, նրանց ճնշելու երևույթը։ Պատկերացնո՞ւմ եք՝ 12 տարի երեխան նստած է դասարանում և չի կարողանում կարդալ, բավարար չափով հաղորդակցվել․ դա խոշտանգում է, և մենք դրա վրա աչք ենք փակել։
Փորձագետի խոսքով՝ 33-ից ավելի բարձր տոկոս են կազմում այն երեխաները, որոնք տրամաբանական խնդիր լուծելու պրոբլեմ ունեն։ Այս վիճակագրական տվյալներն արձանագրվել են 4 տարի առաջ, մինչ այժմ այդ երեխաների իրավունքը չի վերականգնվել։
«5 տարի հետո էլ այդ երեխաները կմնան անգրագետ։ Ի՞նչ է անում ԿԳՄՍ-ն, ի՞նչ է նշանակում, թե փորձում են ինչ-որ բաներ անել։ Ի՞նչ է արվում, որ այդպիսի երեխան հաջորդ դասարան չփոխադրվի, և վերականգնվի նրա իրավունքը, որ գիտելիք ստանա։
Ծնողները դիմում են դասապատրաստողների, մասնավոր դասերի և դրանով երեխային ներշնչվում է, որ ինքն անկարող է, նրա ինքնուրույնությունը վտանգի տակ է հայտնվել»,- նշեց Մինասյանը՝ հավելելով, որ մինչև լուրջ փոփոխություններ չիրականացվեն, այդ թվում նաև դասավանդման էֆեկտիվության, որևիցե դրական արդյունք ակնկալելն անհնար է։
Մանրամասները՝ տեսանյութում։
