28.11.2024 | 23:27
Վրաստանում ցուցարարները շարժվում են դեպի խորհրդարան
Բաքուն Իրանը «ահաբեկչությունը սատարող պետություն» է որակել
Քաղաքականություն
31.03.2023 | 11:27
Ադրբեջանի Պաշտպանության նախարարությունն արձագանքել է Իրանի ցամաքային զորքերի հրամանատար Կիրոմերս Հեյդարիի հայտարարություններին՝ դրանք որակելով «ստոր զրպարտություն»։
«Հեյդարին իր անհեթեթ խոսքերով պնդում է, որ, իբր, Ադրբեջանում գոյություն ունեն «սիոնիստական» ուժեր, և որ 44-օրյա պատերազմում Ադրբեջանն օգտագործել է Սիրիայից բերված ԻԼԻՊ-ի ահաբեկիչներին, և որ նրանք դեռ գտնվում են երկրի տարածքում։ Նա նաև հայտարարել է, որ Իրանը թույլ չի տա փոփոխություններ Հայաստանի հետ սահմանին»,- ասվում է հայտարարության մեջ։ Նշվում է, որ Իրանը Հայաստանին «երբեք օկուպացիայի մեջ չի մեղադրել», հակառակը՝ ուժեղացել է հայ-իրանական եղբայրությունը։ «Այսօր բոլոր համարի գաղտնիք չէ, որ Հայաստանն աշխարհում ունի երկու գլխավոր դաշնակից, որից մեկը Ֆրանսիան է, երկրորդը՝ Իրանը»,- ասվում է հայտարարությունում։
Բացի այդ, Ադրբեջանի ՊՆ-ն, չնայած բազմաթիվ փաստական ապացույցներին, որոնք Հայաստանը ներկայացրել է միջազգային դատական ատյաններում, նշում է, թե պատերազմում, իբր, «Ադրբեջանը միայնակ է գործել ու հասել հաղթանակի»։ Բաքուն նաև առաջին անգամ Իրանին «ահաբեկչությունը սատարող երկիր» է անվանել։
«Իրանի հայտարարությունը ոչ այլ ինչ է, քան անիմաստ մեղադրանք և զրպարտություն։ Հեգնանք և ծիծաղ է առաջացնում ահաբեկչությանն աջակցող պետության բարձրաստիճան զինվորականի կողմից նման մեղադրանքը, ում անունը հայտնվում է աշխարհի տարբեր երկրներում ահաբեկչական գործողությունների կատարման մեջ»,- ասվում է հայտարարության մեջ։
Իրանի ցամաքային զորքերի հրամանատար Կիրոմերս Հեյդարիի տեսանյութը վերջին օրերին ակտիվորեն տարածվում է տելեգրամյան ալիքներով, թեև այն, ըստ ամենայնի, տեսագրվել է դեռևս 2021-ի հոկտեմբերին։
«Կովկասում կան մի շարք զգայուն հարցեր, որոնցից մեկը Ադրբեջանի սահմաններին սիոնիստական ռեժիմի ներկայությունն է»,- ասել է Հեյդարին։
Նա հայտարարել է, որ Իրանը թույլ չի տա «սիոնիստական էլեմենտներ» տարածաշրջանի երկրներում և դրան հակազդելու է։
Հեյդարին նաև հայտարարել էր, որ «մյուս խնդիրը տարածաշրջանում պետական սահմանների փոփոխման անօրինականությունն է, Իրանը հարգում է հարևան երկրների սահմանները և թույլ չի տա դրանք փոխել»։
Էմմա Չոբանյան
