Քերոբյանը` ՌԴ հայկական արտադրության կաթնամթերքի արտահանման սահմանափակումների մասին․ ՏԵՍԱՆՅՈՒԹ

Հայկական կաթնամթերքը Ռուսաստան արտահանելու հնարավոր արգելքում, կարծում եմ, քաղաքական որևէ ենթատեքստ չկա: Այս մասին այսօր Կառավարության հերթական նիստից հետո լրագրողների հետ զրույցում ասաց ՀՀ էկոնոմիկայի նախարար Վահան Քերոբյանը:
Նա նշեց, որ սանկցիաներ առայժմ չեն կիրառվել, իրենք ռուս գործընկերների հետ կապի մեջ են:

Քերոբյանի խոսքով՝ այդ ամենը սննդի անվտանգության բարձր չափանիշներն ապահովելու համար է:

Անդրադառնալով դիտարկմանը, որ նշվում է, թե արգելափակումը պայմանավորված է իրանական հումքով, նախարարը հաստատեց, որ Հայաստանում արտադրվող կաթնամթերքում օգտագործվում է իրանական հումք. «Մենք երբեմն տալիս ենք արտոնություններ ընկերություններին կաթնային սերուցք ներմուծելու համար: Իրանական կազմակերպություններ կան, որ գտնվում են Եվրասիական ռեեստրի մեջ և թույլատրված է իրենցից կաթնային սերուցք ներմուծել և օգտագործել դեպի ՌԴ արտահանվող ապրանքի մեջ․․․ Կարծում եմ՝ ընդհանուր լուծումներ կգտնենք»:

Անդրադառնալով այն դժգոհություններին, որ հայկական մի շարք ընկերություններ չոր կաթով են կաթնամթերքն արտադրում, և զուգահեռ 40 դրամով նվազեցվել է կաթի մթերման գինը, Քերոբյանն արձագանքեց. «Չեմ կարծում, որ ընկերությունները խախտում են կաթնամթերքի արտադրության ստանդարտները: Սննդի անվտանգության տեսչական մարմինը դրան ուշադիր հետևում է: Բայց, այո, խնդիրը կա, դա արձագանք է դրամի հետևողական արժևորման, որը տեղական կաթ արտադրողների արտադրանքը դարձնում է ավելի քիչ մրցունակ, քան ներմուծված կաթի փոշին»:

Անդրադառնալով Հայաստանի տնտեսության ցուցանիշին՝ նախարարը նշեց, որ առաջիկա 2 ամիսներին բարձր տնտեսական աճի տեմպը Հայաստանը պահպանում է. «Արդեն 10 ամիս է՝ ունենք երկնիշ տնտեսական ակտիվության ցուցանիշ: Մեր թիրախը՝ այնպես անել, որ Հայաստանն իր կառավարության ծրագրով թիրախավորած 7-9 տոկոս տնտեսական աճը ապահովի ամեն տարի՝ 2021-26 թթ-երին»:

Մանրամասները՝ տեսանյութում։