Եկեք մեր աչքերը չփակենք Լաչինի միջանցքի այս հանցավոր շրջափակման վրա․ ֆրանսիացի պաշտոնյա

Ֆրանսիայի Օվերնյ-Ռոն-Ալպ շրջանի նախագահ Լորան Վոքիեի պատվիրակությունը երկօրյա աշխատանքային այցով Սյունիքում է։ Ֆրանսիացի պաշտոնյան նաև այցելել է Լաչինի միջանցք ու փակ ուղեկալի առջևից տեսաուղերձ է հղել՝ հայտարարելով․ «Եկեք  մեր աչքերը չփակենք Լաչինի միջանցքի այս հանցավոր շրջափակման վրա ու թույլ չտանք, որ այս բնակչությունը լուռ մահանա»։

«Մենք Լաչինի միջանցքի առջև ենք, և ես ուզում եմ՝ տեսնեք, թե ինչ է կատարվում իմ մեջքի հետևում։ Ու նաև դիմում եմ ձեզ, որ կիսվեք այս տեսանյութով: Իմ հետևում Արցախի 150 000 հայ բնակչությունն է, որն ավելի քան 100 օր կտրված է ամեն ինչից։ Այստեղ սնունդ և դեղամիջոց չի մատակարարվում և միայն «Կարմիր խաչի միջազգային կազմակերպությունն» է, որ կարող է անցնել այս ճանապարհով։ Սա միջազգային իրավունքի և մարդու իրավունքների տոտալ խախտում է։ Միջազգային քրեական դատարանը Ադրբեջանին պարտադրեց բացել այս ճանապարհը, սակայն ոչինչ չարվեց: Իմ հետևում մարդիկ են, որոնց սովի են մատնել։ Սա պետք է իմանալ:

Այսօր մի կեղծ բացատրություն կա, թե բոլորի հայացքներն այժմ այլ կողմ են ուղղված (նկատի ունի Ուկրաինայի պատերազմը, խմբ․)։ Եվ մոռացել են թե ինչ է կատարվում այստեղ։ Իսկ այն, ինչ կատարվում է այստեղ՝ դրամա է: Սա մարդու իրավունքների տոտալ խախտում է:

Պետք է իմանալ թե ինչ է կատարվում այստեղ՝ Լաչինի միջանցքում ու Արցախում հայ բնակչության հետ։ Շնորհակալաություն, որ կիսվում եք տեսանյութով և օգնում եք այս ճշմարտությունը տարածելուն։ Հայերն ու Արցախի բնակչությունը սրա կարիքն ունեն, նրանք մահանում են լռությունից»,- ասել է ֆրանսիացի պաշտոնյան։

Անահիտ Խաչատրյան