Քաղաքականություն
29.03.2023 | 21:23
Ադրբեջանի Թվային զարգացման և տրանսպորտի նախարարությունը նախագահ Իլհամ Ալիևի ընտանիքին պատկանող PASHA Holding ընկերությունների խմբի աջակցությամբ և Իսրայելի Technion ինստիտուտի հետ համագործակցությամբ ադրբեջանական կիբերանվտանգության կենտրոն է ստեղծել, գրում են տեղական լրատվամիջոցները։
Նշվում է, որ երկրի կիբերանվտանգության կարողությունների ամրապնդման նպատակով ստեղծված կենտրոնը «կկատարի կրթական հաստատության դեր՝ այս ոլորտում բարձր որակավորում ունեցող մասնագետների և թրեյներների պատրաստման համար»։ Երեք տարվա ընթացքում նախատեսվում է ավելի քան 1000 մարդու ուսուցում։ Կենտրոնում 15 դասընթացավարների վերապատրաստումից հետո նախատեսվում է պատրաստել կիբերանվտանգության ոլորտի մասնագետների։
Կենտրոնն ունի դասասենյակներ, մոդելավորման սենյակներ և ժամանակակից տեխնոլոգիաներով և սարքավորումներով հագեցած լաբորատորիաներ։
Պաշտոնական բացումը տեղի է ունեցել նախօրեին, որին մասնակցել են Ադրբեջանի Պետական անվտանգության ծառայության ղեկավար Ալի Նագիևը, թվային զարգացման և տրանսպորտի նախարար Ռաշադ Նաբիևը, Իսրայելի նախկին արտգործնախարար Գաբի Աշքենազին, Technion ինստիտուտի գործադիր փոխնախագահ և գործադիր տնօրեն Բոազ Գոլանին, Իսրայելի դեսպանատան ներկայացուցիչներ և այլ պաշտոնյաներ։
Արդեն մեկնարկած դասընթացներին ներգրավվել է 60 մարդ։
Էմմա Չոբանյան
