08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Ադրբեջանն ու Իսրայելը կիսում են Իրանի սպառնալիքը, պետք է միասին գործենք․ Իսրայելի ԱԳ նախարարը՝ Բայրամովին
Քաղաքականություն
29.03.2023 | 14:55
Երուսաղեմում Ադրբեջանի ԱԳ նախարար Ջեյհուն Բայրամովի հետ հանդիպումից հետո հրավիրված ասուլիսում Իսրայելի ԱԳ նախարար Էլի Քոենը հայտարարել է, որ երկու երկրները կիսում են Իրանի կողմից սպառնալիքը, գրում են ադրբեջանական լրատվականները։
«Ադրբեջանն ու Իսրայելը կիսում են Իրանի սպառնալիքը: Իրանը սպառնում է մեր տարածաշրջանին և անկայունություն է ստեղծում Մերձավոր Արևելքում՝ աջակցելով և ֆինանսավորելով ահաբեկչությանը: Մենք պետք է միասին գործենք Իրանի դեմ: Չպետք է թույլ տանք, որ Իրանն ընդլայնի իր միջուկային ներուժը»,- ասել է Քոենը։
Բացի այդ, պաշտոնյան նշել է, որ Ադրբեջանն Իսրայելի ռազմավարական գործընկերն է։
«Ադրբեջանի դեսպանը մի քանի օր առաջ իր հավատարմագրերն է հանձնել նախագահ Հերցոգին և արդեն պաշտոնապես սկսել է աշխատանքը: Ադրբեջանն Իսրայելի ռազմավարական գործընկերն է: Մենք համագործակցում ենք ամենալայն ասպեկտներով տարբեր ոլորտներում»,- ասել է Քոենը՝ հավելելով, որ Իսրայելում Ադրբեջանի դեսպանատուն բացելու որոշումը «կօգնի խորացնել հարաբերությունները երկու երկրների կառավարությունների և ժողովուրդների միջև»։
Էմմա Չոբանյան
