Փաշինյանն այսօր կմասնակցի Բայդենի նախաձեռնած «Հանուն ժողովրդավարության» գագաթնաժողովին․ որ պետություններն են հրավիրվել և ինչ են քննարկելու

Մարտի 28-30-ը տեղի է ունենում «Հանուն ժողովրդավարության» երկրորդ գագաթնաժողովը, որը վարում է ԱՄՆ նախագահ Ջո Բայդենը։ Գագաթնաժողովին հրավիրված է նաև ՀՀ վարչապետ Նիկոլ Փաշինյանը։ Այս անգամ Բայդենը գագաթնաժողովին հրավիրել է 121 առաջնորդի, ինչը ութով ավելի է, քան նախորդ տարի էր։ Պակիստանը մերժել է մասնակցության հրավերը, իսկ Թուրքիան, Ադրբեջանն ու Հունգարիան հերթական անգամ չեն հրավիրվել այս ֆորումին։

Փոխարենը գագաթնաժողովին հրավիրվածների ցուցակում ընդգրկվել է Հնդկաստանը։ Գագաթնաժողովի կազմակերպիչները ծրագրում են ամրապնդել ժողովրդավարական երկրների միասնությունը ավտորիտար ռեժիմների վերելքի ֆոնին, որոնց թվում, ըստ Սպիտակ տան, հատկապես մտահոգիչ են Մոսկվան և Պեկինը։

Գագաթնաժողովը հիմնականում տեղի է ունենալու օնլայն ռեժիմով։ Հանդիպումների ընթացքում ծրագրվում է քննարկել ուկրաինական հակամարտությունը, կոռուպցիայի դեմ պայքարը, կանանց իրավունքները, ժողովրդավարության զարգացման հարցում համագործակցությունը, ինչպես նաև այլ հարցեր։
Վերջին անգամ նման ֆորում գումարվել էր 2021 թվականի վերջին։

Բայդենին գագաթնաժողովի նախագահության հարցում կօգնեն ներկայացուցիչներ տարբեր մայրցամաքներից՝ Նիդեռլանդների վարչապետը՝ Եվրոպայից, Զամբիայի նախագահը՝ Աֆրիկայից, Կոստա Ռիկայի ղեկավարը՝ Հարավային Ամերիկայից, Հարավային Կորեան՝ Ասիայից։

Տաթև Ֆռանգյան