14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Թուրքիայի ընդդիմությունը պահանջում է Էրդողանի թեկնածությունը հեռացնել նախագահական ընտրություններից
Քաղաքականություն
29.03.2023 | 14:35
Թուրքիայի երեք ընդդիմադիր կուսակցությունների ներկայացուցիչներ դիմում են ներկայացրել Բարձրագույն ընտրական հանձնաժողով՝ պահանջելով գործող նախագահ Ռեջեփ Թայիփ Էրդողանին հանել մայիսին կայանալիք նախագահական ընտրությունների թեկնածուների ցուցակից, գրում է DW-ի ռուսական ծառայությունը։
Նրա առաջադրումը սահմանադրության խախտում է, քանի որ Էրդողանն արդեն երկու անգամ ընտրվել է նախագահ։ Այսպես են կարծում «Լավ», «Ժողովրդավարություն և բեկում» և «Հայրենիք» կուսակցությունները:
2014 և 2018 թվականներին նախագահական ընտրություններում հաղթած Էրդողանը երրորդ անգամ առաջադրվելու իրավունք կունենա միայն այն դեպքում, եթե Թուրքիայի խորհրդարանը արտահերթ ընտրություններ նշանակի, շեշտում են ընդդիմադիրները, այնինչ մայիսի 14-ին կայանալիք ընտրություններն այդպիսին չեն։
Իր հերթին իշխող «Արդարություն և զարգացում» կուսակցության խոսնակ Օմեր Չելիքը մարտի 28-ին հայտարարել է, որ ընտրություններին Էրդողանի մասնակցության համար որևէ խոչընդոտ չկա։ Նրա խոսքով՝ 2018 թվականի սահմանադրության փոփոխությունից հետո, առաջին անգամ է ընտրվել նոր նախագահական համակարգով, հետևաբար՝ նրա նախկին նախագահական ժամկետը հաշվի չի առնվում։
Սահմանադրական իրավունքի ոլորտի թուրք փորձագետները միանշանակ մեկնաբանություն չունեն՝ արդյո՞ք օրենքի նորմերը թույլ են տալիս Էրդողանին կրկին առաջադրվել։ Սպասվում է, որ Թուրքիայի նախագահի թեկնածուների վերջնական ցուցակը կհրապարակվի մարտի 31-ին։
Տաթև Ֆռանգյան
