Ծառահատում Սյունիքում՝ մարզպետի թողտվությամբ

ՀՀ Սյունիքի մարզի Շուռնուխ գյուղից դեպի Կապան ընկած ճանապարհահատվածում ծառահատումներ են իրականացվում: Երեկ Factor.am-ի տեսախցիկը ֆիքսել էր, թե ինչպես են մի քանի անձինք հատում հաստաբուն կանաչ ծառերը: 
Մեզ հետ զրույցում նշված անձինք վստահեցրին, որ ունեն համապատասխան թույլտվություն «Հայատնառի» «Սյունիքի անտառտնտեսություն» մասնաճյուղից: «Գորիսի ճանապարհաշինարարները դիմել են Սյունիքի մարզպետին՝ հայտնելով, որ ծառերը խանգարում են ձնամաքրման աշխատանքներին, Սյունիքի մարզպետն էլ դիմել է «Հայանտառի» տնօրենին, և իրենք մեզ թույլատրել են լրիվ օրինական ճանապարհով ծառահատում իրականացնել»,- Factor.am-ի հետ զրույցում պարզաբանեց «Հայանտառի» «Սյունիքի անտառտնտեսություն» մասնաճյուղի տնօրեն Արմեն Իշխանյանը՝ վստահեցնելով, որ ունեն բոլոր անհրաժեշտ փաստաթղթերը:

Իշխանյանի փոխանցմամբ՝ փայտը հենց տեղում վաճառում են՝ գումարը փոխանցելով թե՛ «Հայանտառին», թե՛ պետական բյուջե:

«Հատվել են մոտավորապես 5-7 կմ ճանապարհահատվածի եզրին ընկած ծառեր, որոշ տեղերում գուցե միայն ճյուղերը հատվեն, որովհետև ձմռանը մեքենաներին չեն խանգարում»,- հավելեց Արմեն Իշխանյանը՝ նկատելով, որ ծառահատումների «օգուտը» մարդիկ կզգան ձմռանն` այդ ճանապարհահատվածով երթևեկելիս:

«Սյունիքի անտառտնտեսություն» մասնաճյուղի տնօրենը նաև նշեց, որ Սյունիքի մարզպետ Վահե Հակոբյանին առաջարկել է թփեր տնկել այն հատվածում, որտեղ ծառերը հատվում են:

Շողիկ Գալստյան