25.11.2024 | 17:23
Թուրքիայում մարմարի հանքում սողանքի հետևանքով զոհեր կան
Բաբկեն Թունյանն ու Ճապոնիայի դեսպանն անդրադարձել են Լաչինի միջանցքի շրջափակմանը և դրա հումանիտար հետևանքներին
Քաղաքականություն
24.03.2023 | 15:55
Ճապոնիան առաջին երկրներից էր, որ արձագանքեց 2020 թվականի ադրբեջանական ագրեսիայի հետևանքով առաջացած հումանիտար ճգնաժամին: Այս մասին ԱԺ-ի փոխանցմամբ՝ ասել է Հայաստան-Ճապոնիա բարեկամական խմբի ղեկավար Բաբկեն Թունյանը ՀՀ-ում Ճապոնիայի արտակարգ և լիազոր դեսպան Մասանորի Ֆուկուշիմայի հետ հանդիպման ընթացքում:
Ողջունելով հյուրին` բարեկամական խմբի ղեկավարը բարձր է գնահատել դեսպանի գործունեությունը մեր երկրում: Նա շնորհակալություն է հայտնել Ճապոնիային Հայաստանին ցուցաբերած աջակցության համար` կարևորելով երկու երկրների փոխհամագործակցության խորացումն ինչպես տնտեսական, այնպես էլ մյուս ոլորտներում:
Անդրադառնալով Լաչինի միջանցքի շրջափակմանը և դրա պատճառով առաջացած հումանիտար հետևանքներին և հիմնախնդիրներին` Բաբկեն Թունյանը նշել է, որ 120 հազար մեր հայրենակից գտնվում է փաստացի շրջափակման մեջ: Նա անդրադարձել է նաև Ադրբեջանում պահվող հայ գերիների հարցին:
Մասանորի Ֆուկուշիման ընդգծել է, որ Ճապոնիան կարևորում է Հայաստանի հետ փոխհամագործակցությունը: Նա նշել է, որ Ճապոնիան պատրաստ է նպաստել Հայաստանում իրականացվող բարեփոխումներին թե՛ դեմոկրատական ինստիտուտների կայացման, թե՛ թվայնացման և այլ ուղղություններով: Դեսպանի խոսքով՝ այս ընթացքում տեղի են ունեցել բավականին ակտիվ մշակութային միջոցառումներ: Մասանորի Ֆուկուշիման կարևորել է փոխադարձ այցելությունները թե՛ բարեկամական խմբերի և թե՛ գործարար համայնքների միջև:
Դեսպանը պատրաստակամություն է հայտնել նպաստելու Հայաստանի ճանաչելիության մեծացմանը Ճապոնիայի գործարարների շրջանակում:
