Ընթանում են քննարկումներ․ Ժաննա Անդրեասյանը՝ ՀՀ-ում ռուսական դպրոցների գործարկման մասին․ ՏԵՍԱՆՅՈՒԹ

«Մեր երկրում պետական լեզուն մեկն է, եւ դա հայերենն է: Ինչ վերաբերվում է համատեղ ծրագրին ռուսական կողմի հետ, որը պետք է լինի հանրակրթական մակարդակում որոշակի հաստատությունների ձեւաչափով, դեկտեմբերին կայացավ հայ-ռուսական միջկառավարական հանձնաժողովի նիստը, որտեղ հստակ արձանագրվեց, որ պետք է քննարկենք դրա կոնցեպտը»,- ասուլիսում ասաց ԿԳՄՍ նախարար Ժաննա Անդրեասյանը՝ պատասխանելով լրագրողի այն հարցին, որ մի քանի օր առաջ ՌԴ արտգործնախարար Սերգեյ Լավրովը կրկին հիշատակել է Հայաստանում ռուսական դպրոցների գործարկման անհրաժեշտությանը, ի՞նչ մտադրություններ ունի Հայաստանն այս առումով:

Նախարարի խոսքով՝ դրա նպատակով պետք է ձեւավորվի աշխատանքային խումբ, աշխատանքային խումբն արդեն ձեւավորվել է թե ռուսական, թե հայկական կողմի ներկայացուցիչների մասնակցությամբ:

«Մենք ունենք մեր պատկերացումները, թե ինչպիսի համատեղ նախագծի մասին կարող է խոսք լինել, ինչը ես հնչեցրել եմ: Ունենք շատ լավ համատեղ ծրագրի օրինակ՝ հայ-չինական դպրոցի մասով, որտեղ ենթակառուցվածքների մասով Չինաստանի կառավարությունն արել է մեծ ներդրում, կառուցվել է դպրոցական նոր շենքը, հագեցվել է սարքավորումներով, գույքով, այնուհետեւ համատեղ աշխատանք ենք անում բովանդակության մասով: Այսինքն` այս դպրոցում կա չինարենի, ինչպես նաեւ Չինաստանի մշակույթի, պատմության ուսուցման հնարավորություն, ու մասնագետներ են գործուղվում Չինաստանի կառավարության կողմից, ֆինանսական հավելյալ օժանդակություն է տրվում: Սա այն է, ինչ մենք արդեն իսկ ունենք որպես համատեղ ծրագրի օրինակ, ինչը ռուսական կողմին արդեն իսկ ներկայացրել ենք»,- նշեց նախարարը:

Մանրամասները՝ տեսանյութում: