Կրե՛մլն է ՀՀ-ում հրահում հակառուսականություն․ Լավրովը արե՛ց դա՝ Արցախն Ադրբեջանին ինտեգրելուց խոսելով․ Անահիտ Ադամյան․ ՏԵՍԱՆՅՈՒԹ

«Հանրապետություն» կուսակցության անդամ, հրապարակախոս Անահիտ Ադամյանը Factor TV-ին տված հարցազրույցում պնդում է, որ Ադրբեջանի հետ Հայաստանի խաղաղության կնքվելիք պայմանագիրը կլիներ հայկական շահերի հաշվին, եթե հանդիպումները և քննարկումները լինեին Ադրբեջանի, Ռուսաստանի և Հայաստանի միջև․ «Խաղաղության պայմանագիր Հայաստանի և Ադրբեջանի միջև հնարավոր կլինի միայն մեկ պարագայում, երբ կլինի ուժերի որոշակի հավասարակշռություն։ Այո՛, ԱՄՆ-ն, Ֆրանսիան, ԵՄ-ն ուզում են արագ տարածաշրջանում հասնել կայունության և խաղաղության։ Դա միանշանակ չի լինի մեր հաշվին»։

Իսկ ինչի՞ վրա է հիմնված ԱՄՆ պետքարտուղար Էնթոնի Բլինքենի այն կարծիքը, որ Ադրբեջանն ու Հայաստանը շուտով կարող են խաղաղության համաձայնագիր ստորագրել։ Նա տեսել է հնարավորություն, որը թույլ է տալիս փաստացի ավարտին հասցնել խաղաղության համաձայնագրի նախապատրաստումը։ Նա նաև Վաշինգտոնում սպասում է Հայաստանի և Ադրբեջանի ԱԳ նախարարներին, որոնց հետ աշխատել են համաձայնագրի տեքստի վրա։

Բլինքենի խոսքով՝ ինքն ակտիվորեն զբաղվում է Ադրբեջանի և Հայաստանի միջև կարգավորման խնդրով՝ նպաստելով, որ կողմերը «հասնեն խաղաղ համաձայնագրի ձեռքբերմանը, որը կկարգավորի Բաքվի և Երևանի միջև հարաբերությունները», ինչպես նաև կվերաբերի «Լեռնային Ղարաբաղում էթնիկ հայերի իրավունքներին և պաշտպանությանը», «սահմանի սահմանազատանը» և այլն։

ԱՄՆ պետքարտուղարն ասաց նաև, որ ՀՀ-ին չի պարտադրվում որևէ լուծում․ «Մենք արձագանքում ենք Հայաստանի արտահայտած մեծ ցանկությանը, որը ցանկանում էր տեսնել՝ արդյո՞ք մենք կարող ենք օգնել նրանց հասնել համաձայնության, որը գոնե հիմնականում վերջ կդնի ավելի քան 30 տարի շարունակվող հակամարտությունը»։

Անահիտ Ադամյանն ասում է, որ ԱՄՆ-ի նպատակը տարածաշրջանում կայուն խաղաղության հաստատումն է, ինչին հասնելու նպատակով պետք է հասնել երկու կողմի փոխըմբռնմանը։

«Եթե Ալիևի ասածներն ի կատար ածվեն, դա կնշանակի՝ տարածաշրջանի մի քանի պետություններ պիտի վերանան, և ոչ միայն Հայաստանը»,- ասաց Անահիտ Ադամյանը։

Հարցազրույցն ամբողջությամբ՝ տեսանյութում։

Ռոբերտ Անանյան