14.12.2024 | 16:44
Անդրանիկ Հովհաննիսյանն իր հավատարմագրերն է հանձնել Վիեննայում ՄԱԿ-ի գրասենյակի գլխավոր տնօրենին
Եթե ՌԴ-ն անհանգստանում է իր տանկերի համար, թող Ուկրաինայից դուրս բերի․ ԱՄՆ-ն՝ Կիևին սպառված ուրանով արկերի մատակարարման մասին
Քաղաքականություն
23.03.2023 | 15:38
Ամերիկյան իշխանություններն Ուկրաինային չեն մատակարարում սպառված ուրանով արկեր, որոնք Մեծ Բրիտանիան խոստացել էր Կիևին, սակայն Ռուսաստանը չափազանցնում է նման զինամթերքի կիրառման սպառնալիքը։ Այս մասին հայտարարել է ԱՄՆ Ազգային անվտանգության խորհրդի ներկայացուցիչ Ջոն Քիրբին, գրում է Meduza-ն։
Մարտի 21-ին Մեծ Բրիտանիայի Պաշտպանության նախարարությունը հայտարարել էր, որ Challenger-2 մարտական տանկերի հետ միասին Ուկրաինա կուղարկի սպառված ուրանով արկեր, որոնք կարող են օգտագործվել ծանր տեխնիկա ոչնչացնելու համար։ Ի պատասխան՝ ՌԴ նախագահ Վլադիմիր Պուտինն ասել է, որ «կոլեկտիվ Արևմուտքն արդեն սկսում է միջուկային բաղադրիչով զենք կիրառել»։
«Սա լայնորեն տարածված զինամթերք է, որը տասնամյակներ շարունակ օգտագործվել է իր զրահաթափանց հատկությունների պատճառով»,- ասել է Քիրբին։
Նա հավելել է, որ արկերը ռադիոակտիվ չեն և չեն դասակարգվում որպես միջուկային զենք։
«Կարծում եմ՝ իրականում Ռուսաստանը պարզապես չի ցանկանում, որ Ուկրաինան շարունակի շարքից հանել իր տանկերը։ Եթե Ռուսաստանը մտահոգ է իր տանկերի ու տանկիստների ճակատագրով, թող դրանք ուղղակի դուրս բերի Ուկրաինայից»,- ասել է ամերիկացի պաշտոնյան։
Ավելի վաղ Մեծ Բրիտանիայի իշխանությունները մեղադրել էին Վլադիմիր Պուտինին Ուկրաինային սպառված ուրանով արկեր մատակարարելու հետ կապված կանխամտածված կեղծ տեղեկություններ տարածելու համար։
Էմմա Չոբանյան
