Բլինքենի զա՞նգն է կանխել նոր պատերազմը. լարվածություն տեղեկատվական ճակատում․ ՏԵՍԱՆՅՈւԹ

Ադրբեջանի ԶՈւ-ն այսօր առավոտյան թիրախավորել է Ճարտար քաղաքի բնակիչներին, երբ վերջիններս «Կլազին ձոր» կոչվող տեղամասում գտնվող խաղողի այգիներում գյուղատնտեսական աշխատանքներ էին կատարում:

«Այգիներին հարակից ադրբեջանական մարտական դիրքերից քաղաքացիական անձանց ուղղությամբ հրաձգային տարբեր զինատեսակներով անկանոն կրակ է բացվել, ինչի հետևանքով դադարեցվել են գյուղատնտեսական աշխատանքները: Տուժածներ չկան։ Տեղեկությունը փոխանցվել է ռուսական խաղաղապահ զորակազմին»,- ասվում է ԱՀ ՆԳՆ հայտարարության մեջ:

Վերջին շրջանում Ադրբեջանի Պաշտպանության նախարարությունը կրկին ապատեղեկատվություն է տարածում, թե ՀՀ ԶՈւ ստորաբաժանումները կրակ են բացել հայ-ադրբեջանական սահմանագոտու արևելյան հատվածում տեղակայված ադրբեջանական դիրքերի ուղղությամբ: Ադրբեջանագետ Տաթևիկ Հայրապետյանը հիշեցնում է՝ նման ծավալի ապատեղեկատվություն ադրբեջանական կողմը տարածում էր սեպտեմբերի 13-ի էսկալացիայից առաջ, իսկ երեկ տելեգրամյան ալիքներում շրջանառվող տեղեկատվության վերլուծությունն ադրբեջանագետին բերել է եզրակացության, որ Ադրբեջանը պատրաստվում է կոնկրետ գործողությունների:

«Իրականում, երեկ շատ ուժեղ էր այդ տեղեկատվական ալիքը, այսինքն` տելեգրամյան ալիքներով հաղորդագրություն էին տարածում, որ լարվածություն է սպասվում, պատասխանատվությունը հայկական կողմի վրա է»,- նշում է Հայրապետյանը:

Ադրբեջանագետն ասում է՝ հայկական կողմից այս ամենին պիտի համարժեք արձագանք լիներ, բայց Հայաստանի պաշտպանական գերատեսչությունը լուռ էր, փոխարենը հայ հանրությունն էր խուճապի մատնվել, և Ադրբեջանի իշխանությունների նպատակն էլ հենց դա էր: Բաքուն չի փոխում ձեռագիրը՝ արձանագրում է Հայրապետյանը, միևնույն ժամանակ չհասկանալով իրանական տելեգրամյան ալիքների ակտիվությունը երեկ նույն ժամանակահատվածում:

«Նախազգուշացնող տեսանյութեր և տարբեր հոդվածներ էին տարածում Ադրբեջանի դեմ, կար տեղեկատվական դիմադրություն»,- ասում է ադրբեջանագետը:

Քանի որ Տելեգրամն այսօր տեղեկատվություն ստանալու ամենաարագ հարթակներից է, թշնամին այն հաճախ օգտագործվում է որպես ապատեղեկատվություն տարածելու միջոց։

Տեղեկատվական անվտանգության փորձագետ Սամվել Մարտիրոսյանը հորդորում է Տելեգրամից տեղեկատվություն ստանալիս հետևել մի քանի պարզ կանոնների, որոնք թույլ կտան ապատեղեկատվության զոհ չդառնալ: Դրանցից գլխավորն այն է, որ եթե տվյալ ալիքին առաջին անգամ եք հանդիպել, ապա պետք չէ հավատալ ու վստահել:

Նոր էսկալացիայի վտանգի մասին խոսելով՝ ադրբեջանագետ Տաթևիկ Հայրապետյանն ասում է՝ Բաքվին զսպում է միջազգային հանրությունը: Երեկ ԱՄՆ պետքարտուղար Էնթոնի Բլինքենը խոսել էր վարչապետ Նիկոլ Փաշինյանի ու Ադրբեջանի նախագահ Իլհամ Ալիևի հետ և, Հայրապետյանի կարծիքով, հենց այդ հեռախոսազանգն է զսպել Բաքվին:

Երեկ Ադրբեջանը տարածել էր տեսանյութեր, որոնք հայտնի չէ, թե երբ են նկարահանվել՝ պնդումով, թե հայկական կողմը զորքեր է կուտակում սահմանին, զենք-զինամթերք է տեղափոխում Ստեփանակերտ-Ղայբալիշեն-Լիսագոր անտառային ճանապարհով: Արցախի ՆԳՆ-ն այսօր հերթական անգամ հերքեց այդ լուրերը։

Որ էսկալացիայի հավանականությունը շատ մեծ է թե՛ ՀՀ սահմանին, թե՛ ԼՂ-ում, հայտարարել էր  վարչապետ Նիկոլ Փաշինյանը օրեր առաջ կայացած մամուլի ասուլիսի ժամանակ: Փաշինյանը նման եզրակացության էր եկել Ադրբեջանի նախագահի՝ օր օրի ագրեսիվացող հռետորաբանությունից:

Մանրամասները՝ տեսանյութում:

Արփի Հակոբյան