09.09.2026 | 09:44
Հանրապետությունում ավտոճանապարհներն անցանելի են
Եռակողմ հանդիպման հնարավորություն առաջիկայում կա․ թեման քննարկվել է Մոսկվայում․ Միրզոյան․ ՏԵՍԱՆՅՈՒԹ
Քաղաքականություն
22.03.2023 | 18:00
ՀՀ-ն համարում է, որ Լաչինի միջանցքի և նրա ռեժիմի շուրջ բանակցությունները վաղուց ավարտվել են, իսկ կարգավորումները տեղ են գտել 2020-ի եռակողմ հայտարարության մեջ։ Կառավարության հետ հարցուպատասխանի ժամանակ ասաց ՀՀ ԱԳ նախարար Արարատ Միրզոյանը` անդրադառնալով այն հարցին, որ Ադրբեջանի նախագահ Իլհամ Ալիևն ԱՄՆ պետքարտուղարի հետ հեռախոսազրույցի ժամանակ խոսել էր ՀՀ սահմանին անցակետ դնելու մասին։
«Ըստ եռակողմ հայտարարության` Լաչինի միջանցքը մնում է ռուս խաղաղապահ ուժերի վերահսկողության տակ, և Ադրբեջանն էլ երաշխավորում է միջանցքով երկկողմ անխափան երթևեկությունը։ Այստեղ պետք է կասկած հայտնենք հետագա բանակցությունների նպատակահարմարության վերաբերյալ, այսինքն` ինչ իմաստ ունի ձեռք բերել այլ հարցերի շուրջ պայմանավորվածություններ, եթե դրանք որոշ ժամանակ հետո խախտվելու են Ադրբեջանի կողմից։ Ոչ, մենք չենք բանակցում Լաչինի միջանցքում ադրբեջանական անցակետ տեղակայելու շուրջ»,- նշեց Միրզոյանը։
Միաժամանակ, Միրզոյանը հիշեցրեց, որ խաղաղության պայմանագրի շուրջ հայկական կողմը ստացել է ադրբեջանական առաջարկները, և աշխատում է դրանց վրա. առաջիկայում կլինեն ՀՀ–ի արձագանքն ու առաջարկները։
«Սակայն Ադրբեջանի հռետորաբանությունն ու կեցվածքը ոչ միայն չեն նպաստում խաղաղության գործընթացին, այլև նոր խոչընդոտներ են ստեղծում այդ ճանապարհին։ Սակայն մեր դիրքորոշումը չի փոխվել` համառորեն և անկեղծորեն շարունակելու ենք բանակցել` նպատակ ունենալով տարածաշրջանում երկարատև ու կայուն խաղաղություն հաստատել»։
Նրա խոսքով` մի կողմից ընթանում է բանակցային գործընթաց, օրինակ, խաղաղության պայմանագրի շուրջ ընթացող գործընթացը, մյուս կողմից, իրականության մեջ տեսնում են Ադրբեջանի` ավելի սրվող հռետորաբանությունն ու սպառնալիքները, ագրեսիվ գործողությունները։
Մանրամասները՝ տեսանյութում:
