Թուրքիայի ընդդիմության նախագահի թեկնածուն խոսել է քրդական հարցի լուծման մասին

Թուրքիայի ընդդիմության նախագահի միասնական թեկնածու Քեմալ Քըլըչդարօղլուն խորհրդարանում հանդիպում է ունեցել քրդամետ Ժողովուրդների դեմոկրատական կուսակցության (HDP) համանախագահներ Փերվին Բուլդանի և Միթհատ Սանջարի հետ, գրում է Gercek News-ը։

Շուրջ մեկ ժամ տևած հանդիպումն ավարտվել է ասուլիսով, որի ընթացքում անդրադարձ է եղել նաև քրդական հարցի լուծմանը։

Քըլըչդարօղլուն խոստացել է լուծել քրդական հարցը Թուրքիայի 13-րդ նախագահ ընտրվելու դեպքում և ընդգծել, որ յուրաքանչյուր անհատ՝ անկախ ինքնությունից, համոզմունքից և ապրելակերպից, արժեքավոր է և պետք է հարգանքի արժանանա:

«Բոլոր խնդիրների, այդ թվում՝ քրդական հարցի լուծման հասցեն խորհրդարանն է։ Չե՞նք հոգնել կռվելուց։ Ինչո՞ւ ենք կռվում, երբ կարող ենք քաղաքակիրթ մարդկանց պես գրկել իրար ու վիճաբանել։ Ինչո՞ւ ենք ճամբարներ ստեղծում հասարակության մեջ: Մենք հանդես ենք գալիս հանուն միասնության և միասնականության։ Մենք կողմ ենք, որ համատեղ գործենք բոլոր այն խնդիրների լուծման համար, որոնք կան՝ հանուն այս երկրի զարգացման։ Քաղաքականությունը չպետք է խնդիրներ ստեղծի, այն պետք է լուծի առկա խնդիրները»,- ասել է Քըլըչդարօղլուն։

Բուլդանը բացատրել է, որ խորհրդարանում հանդիպման անցկացման նպատակն էր՝ ցույց տալ, որ իրենք կողմ են խորհրդարանական շրջանակներում քրդական հարցի դեմոկրատական լուծում գտնելուն։ Սանջարն էլ ասել է, որ մի քանի օրից իրենք հանդիպման մասին մանրամասն հայտարարություն կտարածեն։

Քըլըչդարօղլուն քննադատել է նաև քրդերենը պաշտոնապես չճանաչելու՝ կառավարության քաղաքականությունը՝ ասելով. «Ինչո՞ւ եք հազարավոր տարիներ խոսվող լեզվի համար անհայտ լեզու գրում, պետությունը չպետք է երկակի ստանդարտներ կիրառի»։

Էմմա Չոբանյան