Եթե դատավորներին տեղափոխելու պրակտիկան չդադարի, Շիրակի մարզի փաստաբանները գործադուլի կդիմեն․ ՏԵՍԱՆՅՈՒԹ

Շիրակի մարզի դատավորներին այլ մարզեր տեղափոխելու հետևանքով շուրջ 300 գործի քննություն պետք է նորից սկսվի:
Մեկ ամիս առաջ մարզում քրեական գործեր քննող 4 դատավորներին տեղափոխել են Երևան, որից հետո ևս երկու դատավոր է այնտեղ նշանակվել ու նորից տեղափոխվել: Շիրակի մարզում աշխատող փաստաբաններն արդեն տևական ժամանակ է` դժգոհություն են հայտնում ու բարձրաձայնում այն մասին, որ խախտվում են իրենց պաշտպանյալների իրավունքները:  Մի քանի փաստաբան այսօր Փաստաբանների պալատում ասուլիս են հրավիրել այս թեմայով:

Շիրակի մարզում գործ ունենք մերժված արդարադատության հետ։ Այս մասին ասուլիսի ընթացքում հայտարարեց փաստաբան Արամայիս Հայրապետյանը:

«Այսինքն՝ քաղաքացիները, որոնց գործերը գտնվում են դատաքննության փուլում, կլինի՝ քրեական, քաղաքացիական, թե վարչական, տարիներ շարունակ չեն կարողանում հասնել իրենց գործով որևէ ելքի։ Ստացվում է, որ որևէ դատավոր գործն ընդունում է իր վարույթում, սկսում է գործի քննությունը, հասնում է որոշակի փուլի, տեղափոխվում է այլ դատարան և նոր եկած դատավորը ստիպված է լինում գործը սկսել զրոյից։ Այդ գործերն այնքան են կուտակվել, որ հաստիքների նույնիսկ համալրման դեպքում Շիրակի մարզում գործերի քննության ողջամիտ ժամկետ հնարավոր չէ պահպանել։ Վերջին երկու-երեք տարում Շիրակի մարզում 13-14 դատավորների տեղափոխություն է եղել, այսինքն՝ ողջ կազմի:

Ավելին, Շիրակի մարզում ամենաերկար մնացած դատավորը մնացել է մոտ մեկ տարի։ 1-1.5 տարի աշխատում են, անգամ՝ մի քանի ամիս աշխատում են, հետո տեղափոխվում Երևան կամ այլ մարզեր, որի արդյունքում նրա վարույթում գտնվող քրեական գործերը գումարվում են նոր գործերին, տրվում է այլ դատավորի, ստացվում է, որ ամիսներ շարունակ քրեական գործը քննում են, ռեսուրսներ վատնում, բայց գործը որևէ լուծում չի ստանում»,- նշեց փաստաբանը։

Եթե դատավորներին տեղափոխելու պրակտիկան չդադարի, Շիրակի մարզի փաստաբանները գործադուլի կդիմեն։

Մանրամասները՝ տեսանյութում։