ՀՀ-ն հետընթաց ունի Freedom House-ի ինդեքսում․ Վրաստանի ընդդիմությունը չի դադարեցնում ցույցերը․Լուրեր

• Քննչական կոմիտեն մանրամասներ է հայտնել զորամասում զոհված զինծառայողի դիակի հայտնաբերման վերաբերյալ։ Հաղորդագրության համաձայն՝ ժամկետային զինծառայող Անդրանիկ Օհանյանի դին հայտնաբերվել է զինավանի հավաքակայանի հարակից անտառում՝ ծառից կախված վիճակում: Նախաձեռնվել է քրեական վարույթ։
• Freedom House միջազգային իրավապաշտպան կազմակերպությունը հրապարակել է «Ազատությունն աշխարհում» տարեկան զեկույցը, որում Հայաստանը նահանջել է մեկ հորիզոնականով և 54 միավորով շարունակում է մնալ մասամբ ազատ երկրների շարքում: Զեկույցում նշվում է, որ դատարանները բախվում են համակարգային քաղաքական ազդեցության, իսկ դատական ինստիտուտները խարխլված են կոռուպցիայի պատճառով: իրավապաշտպանները նշում են, որ ոստիկանության կողմից կալանավորների նկատմամբ բռնությունների և բանտերում վատ պայմանների մասին հաղորդումները շարունակվում են: Հակամարտության մասով զեկույցում նշվում է, որ Ադրբեջանին և Լեռնային Ղարաբաղին հարող տարածքներում՝ էթնիկ հայերով բնակեցված տարածքներում խաղաղ բնակիչները շարունակում են մնալ ֆիզիկական բռնության ենթարկվելու վտանգի տակ: Զեկույցում վերահաստատվում է, որ 2022 թվականի սեպտեմբերին ադրբեջանական զինուժը մտել է հայկական տարածք։
• Վրաստանի ընդդիմությունը հայտարարել է բողոքի ցույցերը շարունակելու ծրագրերի մասին՝ չնայած «օտարերկրյա գործակալների» մասին օրինագիծը հետ կանչելուն։ Ընդդիմադիրները հայտարարել են, որ չեն դադարեցնելու ակցիաները, քանի դեռ իշխանությունը չի բացատրել, թե ինչ պայմաններով է հետ կանչել նախագիծը, և քանի դեռ բոլոր ձերբակալված ցուցարարները ազատ չեն արձակվել։

Այս ժամի լուրերը՝ տեսանյութում։