Ինչ է նախորդել դիվերսիային․ Արայիկ Հարությունյանը մանրամասներ է պատմել ադրբեջանցիների հետ հանդիպումից․ ՏԵՍԱՆՅՈւԹ

Կիրակի Արցախում ադրբեջանական կողմի հերթական սադրանքն ամենախոշորն էր վերջին մի քանի ամիսների ընթացքում։ Ադրբեջանական դիվերսիոն խումբը Ստեփանակերտի մատույցներում՝ «Խայփալու» կոչվող տարածքում դարանակալել և հարձակվել է Արցախի ոստիկանության ծառայողների մեքենայի վրա․ երեք ոստիկան զոհվել է, մեկը՝ վիրավորվել։ Ստեփանակերտից հայտնում են, որ նրա առողջական վիճակը գնահատվում է կայուն ծանր՝ թույլ դրական դինամիկայով։

Ըստ Արցախի ՆԳՆ-ի՝ 15 հոգուց բաղկացած ադրբեջանական դիվերսիոն խումբը ոստիկանության անձնագրային և վիզաների վարչության մեքենայի ուղղությամբ կրակել է Ստեփանակերտի Կրկժան թաղամասից դեպի Լիսագոր գյուղ ընկած հատվածում։ Տարածքը Ստեփանակերտի Արմենավան թաղամասից ուղիղ գծով հեռու է ընդամենը երեք կիլոմետր։ Մայրաքաղաքի ծայրամասային թաղամասում բնակվող արցախցիները մի քանի ժամ շարունակ կրակոցների ձայներ են լսել։

Լիանա Ոսկանյանը վեց անչափահաս երեխաների մայր է։ Ընտանիքը մասնատված է արդեն երեք ամիս, ինչ ադրբեջանական կողմը շրջափակել է Լաչինի միջանցքը։ Բազմազավակ մայրն անվտանգային խնդիրների մասին է ահազանգում։

Հիշեցնենք, որ երեկ Բաքուն ահաբեկչությունից հետո հայտարարություն տարածեց, թե, իբր, Հայաստանից Արցախ զենք տեղափոխելու գործընթաց են կասեցրել այդ կրակոցներով, սակայն կարճ ժամանակ անց պաշտոնական Ստեփանակերտը տեսագրություններով մանրամասն ներկայացրեց, թե ինչպես են թշնամական պետության զինյալները հարձակվում դեպի Լիսագոր ընթացող մեքենայի վրա։ Ադրբեջանական կողմը ևս հայտնում է կորուստների մասին։

Փորձագետների կարծիքով՝ Ադրբեջանը, դժգոհ լինելով իր հարձակման արդյունքից, նոր սցենարներ է մշակում։

Արցախում տեղակայված ռուսական խաղաղապահ առաքելությունը որևէ կերպ չի արձագանքել երեկ տեղի ունեցած ահաբեկչությանը, իսկ ՆԳՆ-ից հրապարակված կադրերից պարզ է դառնում, որ նրանք միջադեպից հետո են ժամանում դեպքի վայր։

Պաշտոնական Մոսկվան դեպքից շուրջ մեկուկես օր անց է արձագանքել՝ զսպվածության կոչ անելով երկու կողմերին և շրջանցելով այն անհերքելի փաստը, որ ադրբեջանական կողմն է առաջինը հարձակվել․ «Մարտի 5-ին տեղի է ունեցել զինված միջադեպ, որի հետևանքով զոհեր են եղել և՛ հայկական, և՛ ադրբեջանական կողմից։ Համառորեն կոչ ենք անում կողմերին՝ զսպվածություն ցուցաբերել և քայլեր ձեռնարկել իրավիճակը լիցքաթափելու համար»։

Միջազգային և անվտանգության հարցերի հայկական ինստիտուտի փորձագետ Դավիթ Ստեփանյանի խոսքով՝ ՌԴ-ն իր պարտավորությունները չի կատարում։

Արցախցի ընդդիմադիր գործիչ Տիգրան Պետրոսյանն էլ հայտարարում է Արցախում ռուսական խաղաղապահ առաքելության հրամանատար Անդրեյ Վոլկովի պաշտոնանկության անհրաժեշտության մասին։

Երեկ Ստեփանակերտի ճանապարհին տեղի ունեցած ահաբեկչությունը հաջորդում է փետրվարի 28-ին, մարտի 1-ին և 2-ին տեղի ունեցած միջադեպերին։ Ադրբեջանական կողմն այդ օրերին կրակել էր գյուղատնտեսական աշխատանքներ իրականացնող խաղաղ բնակիչների ուղղությամբ։

Նշենք, որ այս արյունալի իրադարձություններին նախորդել էին Ստեփանակերտ-Բաքու շփումները, որոնց ժամանակ, ըստ արցախյան կողմի, միայն հրատապ հումանիտար հարցեր են քննարկվել։

Մանրամասները՝ տեսանյութում։

Նարեկ Կիրակոսյան